'रेडियो नेपालय् समावेशी ज्याझ्वः मदैगु संभावना’
स्वराज महर्जन
सरकारया स्वामित्वय् दुगु विद्युतिय संचार माध्यम रेडियो नेपालय् आः नेपालभाषा नापं थीथी भाषा भाषीया समाचार लिकाइगु संभावना अप्वया वःगु दु । समिति दयेकाः रेडियो नेपाल संचालन यासांनिसें हे नेपालभाषा नापं मेमेगु झिंन्यागू भाषाया ज्याझ्वः संकतय् लानाः वनाच्वंगु दु । वंगु कार्तिक महिनानिसें भाषाभाषीया ज्याझ्वः संचालन यानाच्वंपिंन्त तलब तकं मबियाच्वंगु नापं अप्रत्यक्ष रुपं त्वःताःवंसां जिउ धकाः धयाच्वंगुलिं स्थायी कर्मचारीतय्त तकं समस्या ब्वलनाच्वंगु दु ।
गुलिं गुलिं भाषाभाषीया पत्रकारत रेडियो नेपालय् वनेगु हे त्वःते धुंकूगु दुसा गुलिं राजीनामा बियाः वने धुंकूगु अवस्था दु । अले आः वनाच्वंपिं नं तलब मवःसां वनाच्वंगु खः धकाः भाषा भाषीया ज्याझ्वः न्ह्याकीम्ह छम्ह कर्मचारीं धयादीगु दु ।
अथे रेडियो नेपालय् वःगु हिउपालं यानाः विशेष यानाः नेपालभाषा लिसे मेमेगु भाषा भाषीया ज्याझ्वःयात लिच्वः लाइगु नापं भाषा भाषीया ज्याझ्वः तकं मन्ह्याइगु संभावना अप्वया वःगु दु धकाः सूत्रं धाःगु दु ।
