अप्पा व्यवसायीतय्गु हाथ्या

अप्पा व्यवसायीतय्सं मूल्य अभिवृद्धि कर (भ्याट)य् दर्ता यायेमाःगु सरकारी नियमयात ध्याक्वय् वांछ्वयाः देशय् दकले न्हापां सरकारयात हाथ्या बीगु ज्या याःगु दु । वंगु आ.दँ. २०६३–६४ निसें अप्पा उद्योगयात भ्याटय् दर्ता यायेमाःगु कथं बजेटय् न्ह्यःथनाः नेपाल सरकारं अनिवार्य नियम दयेकूगु खःसां अप्पा उद्योगीतय्सं थौंतक्क नं दर्ता मयासे सरकारयात हाथ्या बीत स्वःगु स्पष्ट दु । थुकिं यानाः दच्छिया अप्पा व्यवसायीतपाखें वइगु ५० करोड धेबा नं सरकारं ल्हातय् लाके फयाच्वंगु मदु ।
अप्पा उद्योग – व्यवसायीतय्सं आयकर म्हो जक पुलाः छलय् यानावःगु खँय् सरकारं धयावःगु दु । तर अप्पा उद्योगीतय्सं जक मखु, नेपालय् उद्योग व्यवसाय यानाच्वंपिं नां दंपिं यक्को व्यापारीतय्सं आयकर छलय् यानाः वयाच्वंगु दु । भ्याट बिल नक्कली दयेकाः करोडौंया हिनामिना याःगु खँ प्रकाशनय् वयेवं आयकर छलय् याइपिनिगु नां थाय्बापत सार्वजनिक याःथें कारबाही धाःसा सुयातं नं याःगु मदुनि । थुकी सभासद्त नापनापं नांदंपिं उद्योग व्यवसायीत निसें कयाः समाजया प्रतिस्थित व्यक्तित नं दुथ्यानाच्वंगु दु । राजनीतिक भनसुनया कारणं नियम पूर्वक ज्याभ्mवः यायेत नं आः मौका व अवसर पीमाःगु अवस्था वःगु दु ।

अप्पा उद्योग व्यवसायीत थौं आन्दोलनय् कुहांवयाच्वंगु द। भ्याटय् थःपिनिगु उद्योगयात दर्ता मयायेगु व भ्याट छुट दयेमाःगु माग न्ह्यःने हयाच्वंगु खः । सरकार व उद्योग व्यवसायीतय्गु दथुइ तक्वः सहलह जूसां सहमति जुइमफयाच्वंगु खः । अप्पा उद्योग व्यवसायीतय्सं थें हे स्कूलं नं थःपिं करया दायरादुने मवनेगु वा मच्वनेगु धकाः न्हापा हे घोषणा यानावयाच्वंगु खः । देय्दुने अप्पा उद्योगतय्सं दच्छिया दुने १६ अर्ब ८० करोड धेबा बराबरया अप्पा उत्पादन यानावःगु दु । तर थुमिसं कर धाःसा तसकं हे म्हो जक पुलेगु यानावःगु दु । वय्कःपिनिगु अप्पा उत्पादन व कारोबारकथं आयकर व भ्याट ५० करोड स्वयाः अप्वः पुलेमाःगु अवस्था दु । थौंकन्हय् देय्न्यंक ७०० स्वयाः अप्वः अप्पा उद्योगत सञ्चालनय् वयाच्वंगु दु । थुमिसं दच्छिया अन्तशुल्क कथं ७ करोड जक राजश्व पुलाः वयाच्वंगु दु । थुकियात कयाः सरकारं करया दायरादुने हयाः २०६३ सालंनिसें भ्याटय् दर्ता यायेमाः धाःसां अप्पा उद्योग व्यवसायीतय्सं उकियात अस्वीकार यानाः वयाच्वंगु खः । सरकारं भचा कडा व्यवहार क्यनाः कारबाहीया ख्याच्वः बीवं अप्पा उद्योग व्यवसायीत सरकारया उगु कार्यबाहीया विरुद्ध सतकय् कुहांवःगु खः । व्यवसायीतय्सं अप्पा मीगु ज्यातकं माघ १ गतेनिसें बन्द यानाः वयाच्वंगु अवस्था वयेवं हे छेँ दनीपिं सर्वसाधारण जनता मर्काय् लाःगु खः ।

अप्पा उद्योग व्यवसायीतय्सं अप्पा उद्योग प्रकृतिनाप स्वाःगु व्यवसाय जूगु व लेखा तइम्ह मनूया तक्क व्यवस्था यायेमपैmगु कारणं भ्याटय् दर्ता यायेमपैmगु अडान कयावयाच्वंगु खः । नेपाल सरकारं वर्षया २० लखया कारोबार याइगु अप्पा उद्योगयात भ्याटय् याकेत वंगु पुस १७ गते सार्वजनिक सूचना पिकयाः जानकारी ब्यूगु खःसां व्यवसायीतय्सं धाःसा दर्ता यायेमपैmगु खँ पितहयाच्वंगु खः । अप्पा उद्योग व्यवसायीतय्सं सरकारी ऐन नियमयात मानय् मयायेगु धयागु खँ सरकारया नितिं कपाः स्याःगु विषय जुयाच्वंगु दु । मचिकनय् भ्याट लगय् यानाः सर्वसाधारणपाखें भ्याट म्हयेफुम्ह सरकारं करोडौंया व्यापार जुइगु अप्पा उद्योग व्यवसायीतय्त भ्याटय् दर्ता याके मपैmगु अजूगतिया विषय जुयाच्वंगु दु । थ्व इमिगु सरकार प्रतिया हाथ्या खः । सरकारं जक थुकियात छुं गुकथं कयाच्वन, धायेमफु ।

More Stories Like this