मंकाः संघर्ष समिति व नेपाः पार्टीं यानाः दलया नेतातय्त धक्का

किपू(झीगु स्वनिगः)

वंगु वालय् जूगु किपू नगरपालिकाया १७ क्वःगु नगरपरिषद्य् नेवाः स्वायत्त राज्य मंकाः परिषद् किपू व नेपाः राष्ट्रिय पार्टीया नेता व कार्यकर्तातय्सं किपुलिइ क्रियाशिल जुयाच्वंगु राजनीतिक दलतय्त धक्का ब्यूगु दु । उगु नगरपरिषद्य् एकीकृत माओवादीपाखें शम्भुराम महर्जन, नेपाली कांग्रेसपाखें कृष्णमान डंगोल, एमालेपाखें लक्ष्मीकुमार महर्जन अले नेपाल मजदुर किसान पार्टीपाखें नारायण महर्जनं आसन ग्रहण यानादीगु खः । नगरपरिषद्या उद्घाटन समारोहलय् थःपिनिगु अस्तीत्वयात स्वीकार मयात धकाः आपत्ति प्वंकाः नारावाजी तकं याःगु खः । सरकारं दलिय संयन्त्र तकं खारेज याये धुंकूगु अवस्थाय् प्यंगू दलया नेतातय्त जक मञ्चय् तयाः थःपिन्त अपमान याःगु तायेकाः नारावाजी तकं यात ।

गोलमालया दथुइ हे नेवाः स्वायत्त राज्य मंकाः परिषद् किपूया नायः पुचःया दुजः नजरराम महर्जन व नेपाः राष्ट्रिय पार्टीया कृष्णहरी महर्जन मञ्चय् हे वनाः न्वंवानादीगु खः । वय्कःपिन्सं थःथःपिनिगु धापू तयेगु नापं आपत्ति प्वंकेगु ज्या यानादीगु खः ।
उकिं यानाः मेमेगु छुं नं दलया नेतातय्सं न्वंवाये तकं मखन । पर्यटन तथा नागरिक उड्डयन राज्यमन्त्री दिलिप महर्जन मूपाहां जुयाः उलेज्या यानादीगु उगु ज्याझ्वलय् स्वंय मूपाहा नं तकं न्वंवाये मखन । एकीकृत नेकपा (माओवादी)या प्रतिनिधित्व यानादीम्ह शम्भुराम महर्जनं तकं थःगु हे दलया नेता नापं राज्यमन्त्री दिलिप महर्जनयात न्वंवाके बिइमाः धकाः अडान मकाःगु अले मेमेगु दलया नेतातय्सं मूपाहांयात तकं न्वंवाके बिइगु जुइमखु धकाः अडान काःगु खः ।

नेवाः स्वायत्त राज्य मंकाः परिषद् व नेपाः पार्टीया नेता व कार्यकर्तातय्सं मूपाहां यात न्वंवाके बिइमाः धकाः माग याःसां नं स्वयं माओवादीया हे नेतां उगु इलय् माःगु कथं भूमिका म्हितेगु ज्या मयाःगुलिं स्थानीयवासीत तकं अजू चाल । विशेष यानाः कांग्रेस व एमालेया नेतातय्सं राज्यमन्त्री महर्जनयात न्वंवाके बिइमखु धकाः धायेवं किपू नगरपालिकाया कार्याकारी अधिकृत नापं प्रमुख रामलाल श्रेष्ठ छम्हेस्यां जक न्वंवानाः उद्घाटन समारोह हे स्थगित याःगु खः । थ्व हे दथुइ नगरपरिषद् किपू नगरपालिकाया कर्मचारीत जक च्वनाः क्वचायेकूगु दु ।

अथे नेपाः राष्ट्रिय पार्टी व नेवाः स्वायत्त राज्य मंकाः संघर्ष समितिया नेता व कार्यकर्तातय्सं भूमिका म्हितूगुलिं किपुलिइ राजनीतिक संयन्त्र धकाः दावी यानाच्वंपिं नेतातय्त छगू कथं धक्का जूगु दु धकाः मनूतय्सं विश्लेषण यानाहःगु दु । आः किपू नगरपालिकाया विकास निर्माणयात कार्यकारी अधिकारीं गुगु कथं न्ह्याकीगु खः व धाःसा स्वयेगु ल्यं हे दनि ।