बन्दया आंशिक प्रभाव

व्यापक प्रहरी हस्तक्षेपं जनजीवन आतंकित

येँ (झीगु स्वनिगः)

संयुक्त राष्ट्रिय सुकुम्बास मोर्चा नेपाःया ग्वसालय् जूगु स्वनिगः बन्द आंशिक सफल जूगु दु । स्वनिगःया थीथी खुसि सिथय् च्वनाच्वंपिं द्वलंद्वः सुकुम्बासीतय्त व्यापक प्रहरी परिचालन यानाः थाय् थासय् धरपकड यानाः मसाल जुलुस निसें बन्दया ज्याभ्mवःतक्क कुनाबीवं कार्यकर्तात सतकय् खनेमदुगु खः । बन्दया सुथंनिसें येँया शहर बजार तिकः वइपिं कार्यकर्तातय्गु अभाव जुइवं सामान्य व्यापारीतय्सं पसः चायेकूगु खः । अथेहे यातायात साधनत नं शुरुय म्हो जक चलय् जूगु खःसा लिबाः लिसे सामन्य ढंगं गाडीत चलय् जूगु खः ।

रिङ्गरोडया महाराजगञ्ज, बालाजु, सीतापाइला, बल्खु, गोंगःबुँ, कलंकी लगायत थासय् सलंसः प्रहरीतय्त परिचालन याःगु खःसा बन्द आव्हाण कर्तात खनेवं हे प्रहरी ज्वनाः यंकेगु ज्या जूगु खः । अथे खयां नं रिङ्गरोडया जःखः बागू दर्जन गाडीत तोडफोड यायेगु ज्या नापं जूगु खः । सुकुम्बासीतय्गु समस्यायात सरकारं सहानुभूतिपूर्वक बिचाः यानाः वैकल्पिक व्यवस्था यायेमाःगु खँय् बह बीमाःगु धाःसां सरकार थुखेपाखे सकारात्मक जूगु खनेमदु । म्हीगया मसाल जुलुसय् नं व्यापक प्रहरी परिचालन याःगु खः । प्रधानमन्त्री डा. बाबुराम भट्टराईया तप्यंक आदेश बियाः मोर्चाया कार्यकर्तातय्त व्यापक रुपं धरपकड याःगु खः ।

मसाल जुलुसतक्क याके मबिसे प्रहरीं खंकोसित ज्वनाः यंकूगु खः । सुन्धारा, रत्नपार्क लगायत थासय् प्रहरीनाप जूगु झडपय् लानाः स्वंगू दर्जनमयाकं मोर्चाया कार्यकर्तातय्त बांमलाक्क घाःपाः यानाब्यूगु खः । घाःपाः जूपिं कार्यकर्तातय्त म्हिगः हे वीर अस्पतालय् वासः याकाः छेँय् छ्वःगु खः । घाःपाः जूपिं मध्ये झिंछम्हय्सिगु छ्यं तज्याःगु खःसा बागू दर्जन मनूतय्गु ल्हाःत्वःधूगु खः । बन्दया ज्याभ्mवःयात माओवादीया हे किरण समूहया व अखिल नेपाल किसान महासंघ (क्रान्तिकारी)या नं समर्थन दुगु खः । नेपाः राज्यदुने यक्को थासय् सुकुम्बासीतय्गु बस्ति दु । येँ जिल्लादुने जक ६६ गू लागाय् सुकुम्बासीतय्गु बस्ति दु ।

एकीकृत नेकपा माओवादीया न्वकु डा. बाबुराम भट्टराई प्रधानमन्त्ती जुयाच्वंबलय् थुगु कथं प्रहरी दमन छाय्यात धकाः सर्वसाधारण जनतां न्ह्यसः थनेगु यानाहःगु दु । केन्द्रीय स्तरय् सहमति यायेगु, एकता यायेगु – प्रधानमन्त्रीं थःम्हं प्रत्यक्ष आदेश बियाः माओवादीया हे कार्यकर्तातय्त प्रहरीया कत्थिं छ्यं तछ्यायेगुयात उलि सहजरुपं कायेपैm मखु । सुकुम्बासी बस्ति चीकेत सुकुम्बासीत तयार दु । सुकुम्बासी बस्ति दुने च्वनाच्वंपिं नक्कली सुकुम्बासीत नं दु । तर वंगु ४०–५० दँनिसें छेँ बुँ मदयेका च्वनाच्वंपिंत सरकारं वैकल्पिक थाय् बीमाःगु खः ।
खुसि सिथं सुकुम्बासीत चीकेगु खःसा सहलह ब्याकाः सरकारं वातावरण दयेका बीमाः । खेँ येँय् दुपिं नीन्याद्वःया जकमखु, अधिराज्य न्यंक दुपिं नीन्यागू लख सुकुम्बासीतय्गु खः ।