माओवादी सहमतिया थीथी पक्ष

सत्तारुढ पार्टी माओवादी दुनेया आन्तरिक कचवं समाधान यायेगु झ्वलय् निगू पक्ष दथुइ आंशिक रुपं जूसां खँ मिले जूगु समाचार वःगु दु। पार्टी दुने निगू अलग अलग धार ज्वनाः पिहां वःगु सैद्धान्तिक विवादयात आः छथाय् तयाः छगू हे धारया सिद्धान्त दयेकाः न्ह्याः वनेगु सहमति जूगु दु। माओवादी दुने जूगु थ्व सहमति सकारात्मक ला खः तर थ्व सहमति यायेगु लागिं संस्थापन पक्षं जनविद्रोह यायेमाः धइगु लाइनया नेता मोहन वैद्ययात समेत थःगु पक्षय् हःगुलिं धाःसा मेगु राजनीतिक पार्टीत त्रसित जुयाच्वंगु दु। मोहन वैद्य पक्षया जनविद्रोह यायेगु लाइनयात मेगु राजनीतिक पार्टी लगायत अन्तर्राष्ट्रिय समुदायं नं ययेकाच्वंगु खने मदु। वैद्य पक्षया लाइन बाइपास यानाः शान्ति व संविधानया लँय् न्ह्याः वनेत हे अध्यक्ष प्रचण्डयात प्यखेरं दवाव वयाच्वंगु दु। थज्याःगु अवस्थाय् वैद्यया लाइनयात समेत ज्वनाः न्ह्याः वनेगु वय्कःया नीतिं मेपिंत थारा न्हुइकीगु स्वाभाविक खः।
तर माओवादीया थ्व सहमतियात नकारात्मक रुपं जक स्वयेगु नं पाय्छि मखु। मोहन वैद्य पक्षं शान्ति व संविधान धइगु लाइनयात नं न्हापा पूर्ण रुपं समर्थन मयासे च्वनाच्वंगु खः। तर न्ह्यागु हे रुप वा सार कथं थजु, वैद्य पक्षं आः वयाः शान्ति व संविधानया लाइनयात नं समर्थन यायेगु धकाः क्यंगु सहमति धाःसा च्वछायेबहः जू। वैद्य पक्षयात शान्ति व संविधानया पक्षय् हयाः थुज्वःगु सहमति याये फुगुयात नं माओवादी संस्थापन पक्षया सकारात्मक ज्याया रुपय् काये माली। माओवादीया थ्व सहमतिं अवरुद्ध जुयाच्वंगु शान्ति व संविधान च्वज्याया ज्यायात सुचारु याःसा वहे दकलय् बांलाः।

More Stories Like this