उदाय् समाजया गुक्वःगु दँमुँज्या

शिक्षा ख्यलय् थीथी कथंया सिरपाः व छात्रवृत्ति
येँ(सन्ध्या टाइम्स)/उदाय् समाजया गुक्वःगु दँमुँज्या वंगु शनिवाः थनया दिगुख्यः गुथि पकनाज्वलय् जुल। ज्याझ्वःया न्हापांगु सत्रय् मूछ्यांज्ये रत्नकाजी तुलाधरं वार्षिक प्रतिवेदन व दांभरि सर्वज्ञरत्न तुलाधरं आर्थिक प्रतिवेदन न्ह्यब्वयादीगु खः। समाजया नायः डा. रुपज्योति कसाःया सभापतित्वय् जूगु उगु ज्याझ्वलय् न्वकु डा. प्रेमरत्न स्थापितं लसकुस यानादीगु खः।
ज्याझ्वःया निगूगु सत्रय् समाजया थीथी व्यक्तित्वपिंसं नीस्वनातःगु सिरपाः व छात्रवृत्ति लःल्हायेगु ज्या जुल। उकी बुद्धिरत्न हिराशोभा सिरपाः बीबीए २०६६ जरिना तुलाधर व २०६७ करिश्मा स्थापितयात लःल्हात। अथे हे चैत्यहिरा ताम्राकार सिरपाः एसएलसी २०६६ स निलज्मा स्थापित व २०६७ स ज्योतिकातारा तुलाधरयात लःल्हात। मणिहर्ष ज्योति छात्रवृत्ति ११ तगिंया समाज ताम्राकार, क्रिष्टिना सिख्राकार, १० तगिंया रोदिना तुलाधर व पौलिन तुलाधरपिंत, केशरीलक्ष्मी छात्रवृत्ति खुगूगु तगिंया मोनिका तुलाधर, न्यागूगु तगिंया आश्मा तुलाधरयात, प्रत्येकमान जगतशोभा छात्रवृत्ति न्यागूगु तगिंया बिनिशा शिलाकारयात, अंगूरमान सूर्यलक्ष्मी छात्रवृत्ति स्वंगूगु तगिंया प्रशुनरत्न तुलाधरयात, योगवीरसिंह छात्रवृत्ति एमए थेसिस दिव्यतारा ताम्राकार व एमए निगूगु दँया आश्विनवीरसिंह ताम्राकारपिंत लःल्हाःगु खः।
लिसें उदाय् मुना ज्याझ्वलय् उदाय् समाजयात आर्थिक ग्वाहालि बियादीपिं थीथी निकायापिंत हनापौ नं देछाःगु खः। अथे हे चित्तधर 'हृदय' या सुगत सौरभ महाकाव्ययात अंग्रेजीं अनुवाद यानाः तोशिहिदा नुमाता बुक अवार्ड त्याकादीपिं प्रो. टड लेविस व सुवर्णमान तुलाधरयात हनेज्या नं याःगु खः।
ज्याझ्वलय् उदाय् समाजया विधान संशोधन मस्यौदा सफू नं न्ह्यब्वःगु खः। विधान संशोधन उपसमितिया कजि अमृतमानं ताम्राकारं विधान संशोधन बारे ध्वाथुइकादीगु खःसा उदाय् रिसर्च सफूया बिमोचन सफूया दाता पंचवीरसिंह तुलाधरलिसें समाजया नायः डा. रुपज्योति कसाःपिंसं यानादिलसा सफू बारे रिसर्चया संयोजक प्रो. भगवानरत्न तुलाधरं स्पष्ट यानादिल।
ज्याझ्वलय् समाजया संस्थापक नानीभाई स्थापित निवर्तमान नायः पंचवीरसिंह तुलाधरपिंसं समाजं पित बिउगु सिसांनिसें दछितकया नियम बारे टिप्पणी यानादीगु खः। लिसें स्वयम्भूरत्न कसाः, कीर्ति तुलाधर, सागरमान तुलाधर, अमीर ताम्राकार, स्वयम्भूरत्न तुलाधर, अमृतमानसिं बनिया, सानुरत्न स्थापित, आयुरत्न सिख्राकारपिंसं नं न्ववानादीगु खः।