राजनीतिक संयन्त्र छाय् खारेज ?
येँ(सन्ध्या टाइम्स)/स्थानीय निकायय् गठन यानातःगु राजनीतिक संयन्त्र भंग जुइधुंकाः आः गांया ज्या गय् यानाः न्ह्याकेगु धइगु विषयय् सहलह यायेत बलम्बु गाविसया सचिवं छगू सर्वदलीय सहलह ज्याझ्वः न्ह्याकल।
ज्याझ्वलय् राजनीतिक संयन्त्रं बलम्बुइ बांलाक हे ज्या यानाच्वंगु खःसां नेपाः राष्ट्रिय पार्टीं अज्याःगु संयन्त्र छाय् भंग यायेगु बिचाः पित बिल धइगु बारे अन झाःम्ह नेपाः पार्टीया सभासद् बुद्ध साय्मियात न्ह्यसः तःगु खःसा सभासद् साय्मिं उकियात कयाः स्पष्ट यानादिल।
राजनीतिक संयन्त्रय् सकलें क्रियाशील पार्टीया प्रतिनिधि दुथ्याकेगु धाःसां येँ, यल, ख्वप, किपू थेंज्याःगु थासय् न्हय्गू दलया संयन्त्रं सुयातं ज्या मयाकूगु कारणं थःपिं उगु संयन्त्रया विरोधय् वनागु खँ कनादिल। लिसें वय्कलं विकासया नामय् जनताया छेँ थुनाः सतक तब्या यानाच्वंगु खँय् नं विरोध यानादिल।
