भारतीय सञ्चार माध्यम छाय् मौन ?
चिनियाँ प्रमया भ्रमण
येँ(सन्ध्या टाइम्स)/चीनया सुं जर्नेल छम्ह जक नेपाः वल धाःसां नं उकिया व्याख्या विश्लेषण यानाः समाचार बीपिं भारतीय सञ्चार माध्यमत थुगुसी चिनियाँ प्रधानमन्त्रीं हे अजूचायापुगु नेपाः भ्रमण याना वनं नं तिरिक्क हे न्वमवासे च्वनाच्वंगु खनाः सकलें अजू चाःगु दु।
भारतीय सञ्चार माध्यमतय्सं चिनियाँ प्रधानमन्त्रीया नेपाः भ्रमण बारे समाचार हे मबीगु वा बिउसां सुख्खा समाचारया रुपय् जक थाय् बिउगु खनेदु। 'टाइम्स अफ इण्डिया' थेंज्याःगु भारतीय सरकारया लाइन पित हइगु माध्यम कथं नांजाःगु पत्रिका ला थ्व बारे मौन हे जुयाच्वंगु दु।
भारतीय सञ्चारतय् थ्व मौनता केवल मिडिया ख्यःया लागिं जक मखु कुटनीतिक ख्यःया लागिं समेत आश्चर्यया विषय जुइफुगु खँ थन धया हःगु दु।
उकिसनं चिनियाँ प्रधानमन्त्री वेन जियाबाओं नेपाःया भूमिइ च्वनाः नेपाःया हे नेतातय्त 'भारतलिसे स्वापू बांलाकि' धकाः उपदेश समेत बिया थकूगु खः। तर भारतीय मिडियां थुकियात नं महत्व बियाः 'क्यारी' मयाः। न उकियात कयाः छुं लसता हे प्वंकल।
छखे चिनियाँ प्रधानमन्त्रीं नेपाःयात भारतलिसे स्वापू बांलाकि धकाः 'सुझाव' बीगु, अले मेखे भारतीय मिडियां चिनियाँ प्रधानमन्त्रीया नेपाः भ्रमणया समाचार तकं मबीगु थ्व ज्या केवल संयोग जक खः लाकि थुकिया दुने नं छुं स्वापू दु लाकि धकाः कुटनीतिक ख्यलं मालेगु ज्या याःगु सूत्रया दावी दु। चिनियाँ प्रम वंगु शनिवाः मुक्कं न्याघौया लागिं नेपाः वःगु खः।
