न्यायाधीशय् नं दलीय भागबन्डा

बारया सिफारिस अस्वीकार यायेत प्यखेरं दवाव
येँ(सन्ध्या टाइम्स)/राज्यया हरेक पदय् राजनीतिक भागबन्डा यानाः नियुक्ति याना वयाच्वंपिं राजनीतिक दलतय्सं आः अन्तिमय् सर्वोच्च अदालतया न्यायाधीश थेंज्याःपिं मनूत तकं राजनीतिक भागबन्डा यानाः नियुक्ति यायेगु तयारी सुरु याःगु दु।
न्यायालय निष्पक्ष मजुल धकाः आलोचना जुयाच्वंगु हे इलय् न्याय परिषदं सर्वोच्च अदालतया न्यायाधीशत तकं राजनीतिक भागबन्डा जुयाः वःपिं मनूतय्त नियुक्ति यायेगु तयारी याःगु खः।
न्याय परिषद्या थ्व ज्यायात कयाः विवाद जुइवं आः परिषदं थ्व नियुक्ति याये नं मजिउगु व मयासे नं मगाःगु स्थिति जू वःगु दु।
सर्वोच्च अदालतय् नियुक्त याये माःपिं २० म्ह न्यायाधीशय् सु सु तये माली धकाः न्याय परिषदं नेपाल बार एशोसियसनयाके सिफारिस माग याःगु जुयाच्वन। बार एशोसियसनं थःगु एशोसियसन दुने दुथ्याःपिं माओवादी, कांग्रेस, एमाले, मधेसी दल व राप्रपायात समेत भाग थ्याकाः १५ म्ह मनूतय् नां सिफारिस यानाः छ्वया बिल। आः बारं छ्वयाहःपिं मनूतय् नां खंबलय् न्याय परिषद्या कपाः स्याना वःगु दु।
सूत्रतय्सं धाः कथं बारं छ्वया हःगु नामय् छुं मनूत अज्याःपिं नं लाःगु दु गुपिं राजनीतिक पार्टीया कार्यकर्ता जक मखु पार्टीं बियातःगु निश्चित जिम्मेवारी तकं क्वबियाच्वंपिं खः। यदि थज्याःपिं मनूतय्त न्यायाधिश दयेकल धाःसा उमिसं गबलें नं स्वतन्त्र व निष्पक्ष जुयाः न्याय सम्पादन याये फइ मखु धकाः तर्क बीगु याना हःगु दु।
बारं छ्वया हःगु थ्व नांयात स्वीकार मयायेगु लागिं न्याय परिषद्यात प्यखेरं दवाव वयाच्वंगु दु। थन तक कि स्वय्म बारया हे गुलिखे दुजःतय्सं थथे दलीय भागबन्डा यानाः न्यायाधीश नियुक्ति याये मजिउ धासें थःगु हे माउ संस्थां छ्वया हःगु नांयात अस्वीकार यायेत समेत इनाप याना हःगु दु। लिसें राजनीतिक पार्टीया कार्यकर्तातय्त न्यायाधीश दयेके मजिउ धकाः पुलांपिं प्रधानन्यायाधीश व न्यायाधीशतय्सं नं सः तयेगु सुरु याना हःगु दु।
अस्वीकार याःसा अमान्य: बार
सर्वोच्च अदालतया न्यायाधीश नियुक्त यायेगु लागिं नेपाल बारं एशोसियसनं सिफारिस याना छ्वःगु नांयात अस्वीकार यानाः यदि न्याय परिषदं मेपिंत हे न्यायाधीश दयेकल धाःसा उकियात थःपिंसं अस्वीकार यायेगु ख्याच्वः बारया महासचिव विजय मिश्रं बियादीगु दु। नां छ्वया हजि धकाः माग यायेधुंकाः न्याय परिषदं थःपिनि सिफारिसयात माने याये हे माःगु दावी नं वय्कलं यानादिल।