भूकम्प प्रविधिं भूगोलपार्कय् स्मृति सभा

येँ (झीगु स्वनिगः)

भूकम्प प्रविधि राष्ट्रिय समाज नेपालं धर्मपथसं च्वंगु भूगोलपार्कय् भुखाय्पाखें मदुपिनिगु लुमन्तिइ सोमवाः स्मृति सभाया ग्वसाः ग्वःगु दु । वि.सं. १९९० माघ २ गतेया भुखाचं ल्हानाः सीपिंत लुमंकाः पलिस्था जूगु उगु पार्कय् ब्वतिदुपिंसं वइगु दिंसं थज्याःगु अवस्था मवयेमाः धकाः मनंतुंगु खः । सरकारी अधिकारी, नागरिक समाजया दुजः, थीथी संघ संस्थाया पदाधिकारी लिसे विद्यार्थीं उगु पार्कय् दुगु स्मृति स्तम्भय् पुष्पगुच्छा देछाःगु खः ।

ग्वसाः खलःया कार्यकारी निर्देशक आमोदमणि दीक्षितं सीहे मदयेक वइगु भुखाचं तःधंगु ल्याखय् जनधनया क्षति याइगु जूगुलिं थुकियापाखें म्वायेगु उपायया बारे फुक्कसित जानकारी यायेगु न्हापांगु आवश्यकता जूगु खँ कुलेगु ज्या जूगु खः । झिंप्यक्वःगु भूकम्प सुरक्षा दिवस सोमवाः “मन्यंसे, न्वंमवासे वइ, भूकम्पीय विपद्, दने, न्ह्यःज्याये सृष्टिया सम्पदा ल्यंकाःतयेत (नसोधी नबोली आउँछ भूकम्पीय विपद्, जागौँ जुधौँ बचाउन सृष्टिको सम्पदा”) धइगु मू नारालिसे हनेगु ज्या जूगु खः । वि.सं. १९९० माघ २ गतेया भुखाय्या लुमन्ति नेपालय् उगु दिवस दँय्दसं हनेगु यानाः वयाच्वंगु दु ।