माओवादीया कामचलाउ एकता

एकीकृत नेकपा माओवादीया नायः पुष्पकमल दाहाल प्रचण्ड व वरिष्ठ न्वकु मोहन वैद्य किरणया दथुइ कामचलाउ एकता जूगु दु । वंगु निलान्ह्यःनिसें न्ह्याःगु केन्द्रीय समितिया बैठक वंगु आइतवाः क्वचाःगु दु । निम्ह वरिष्ठ नेताया निगू राजनीतिक प्रस्तावयात छलफलया नितिं क्वय् थ्यंक यंकेगु सहमतिकथं विवादया विषययात आःयात थातिइ तयाः वर्तमान संक्रमणकालिन ई व अवस्थाय् शान्ति व संविधान पूवंकेगु पाखे न्ह्याःवनेगु सहमति जूगु खः । निम्ह वरिष्ठ नेताया निगू प्रस्तावयात छगू हे दयेकेगु धयागु खःसा – बैठकया अन्तिम इलय् वयाः निगू प्रस्तावयात यथावत तयाः आःयात जनसंविधान दयेकेत व शान्ति प्रक्रिया पूवंकेगु नियतं थुगु कथंया कामचलाउ एकता यानाः न्ह्याःवनेगु क्वज्यूगु खः । पार्टीया नायः प्रचण्डं ‘शान्ति व संविधान व वरिष्ठ न्वकु किरणं जनविद्रोहया तयारी यायेगु’ कार्यदिशायात बैठकय् न्ह्यःब्वयादीगु खः । उगु निगू कार्यदिशायात कयाः थःथःगु हेकथं अडान कायेवं विवाद मज्यंगु खः । थुकियात अस्थायी उपाय नाला थुगु संक्रमणकालयात छु गुकथं सम्बोधन यानाः न्ह्याःवनेगु व पार्टी नं तःमज्याइगु उपाय धयागु हे थःथःगु अडानयात यथावत तयाः वर्तमान अवस्थाय् जनसंविधान व शान्ति प्रक्रियायात छु गुकथं पूवंकेगु धयागु खँय् ध्यान केन्द्रीत यानाः उगु कथंया सहमति जूगु खः ।

खँ संक्रमणकाल याःगु जक मखु, मूखँ धयागु नायः प्रचण्डं पार्टीया निर्णय व प्रक्रियायात त्वाथलेगु जूवंगु दु । थःम्हं धयागु खँय् अडान मकायेगु व क्रान्तियात लँ दथुइ हे त्वःताः विस्तारवाद व, साम्राज्यवाद व सामन्तवादया न्ह्यःने पुलिं चुयाः इमिगु सेवा व सत्कारया नितिं न्ह्यात्थेंज्याःगु नं ज्या यायेत तत्पर जूगु व जुयाच्वंगु खः । थुगु समस्याया समाधान मजूतलेया एकता – नांजक एकता जुइगु व कामचलाउ स्वयां छुं नं हालतय् ज्याख्यलय् मवइगु नं उलिहे प्रस्तगु खँ खः । सिद्धान्त ज्वनेगु लाकि त्वःतेगु ? क्रान्तियात न्ह्यःने यंकेत जनविद्रोहया लाइन ज्वनेगु लाकि प्रतिक्रान्तिया गालय् कुहांवनेगु धयागु मू खँ खः । दलाल नोकरशाही व विदेशी एजेन्टत नापया लसपस व क्रान्तिकारीत नाप दूरीं माओवादीया संस्थापक्ष अवसरवादय् गालय् कुतुं वंगु खः । संविधान निर्माण व शान्ति प्रक्रिया पूवंकेगु नितिं आत्मसमर्पण यायां न्ह्याः वनाच्वंगु संस्थापन पक्षयात आइन्दा थःयस्से मनय् वःथे स्वच्छन्दरुपं ज्या मयायेगु व वैद्य – थापा समूहनाप नं सहलह ब्याकाः छगू कथं पार्टीगत निर्णय यानाः जक न्ह्याःवनेगु खँय् वंगु आइतवाः केन्द्रीय समितिया बैठकं निर्णय याःगु खः । तर इमान्दारीताया अंश म्हो बेइमानीया अंश अप्वः दुगु संस्थाया पक्षं उगु सर्वसम्मत निर्णययात गुलित महत्व बीगु खः ? गुलित कार्यान्वयन यायेत प्रतिबद्धता क्यनीगु खः – धायेपूmगु अवस्था मदु । अथेला केन्द्रीय समितिया निर्णयत माइन्यूटय् च्वःगु मसि गंके मलाकं संस्थापन पक्षं अस्वभाविकरुपं मन्त्रालयया भागबन्दाया खँ हल्ला पिकयाः बेइमानी यायेधुंकूगु दु ।

संस्थापन पक्षया – प्रचण्ड – बाबुरामपिंसं न्ह्याक्को हे चाकुगु माकुगु खँ ल्हाःसां इमान्दारीताया कमि जुइवं उगु खँया छुं हे महत्व मदु । नयाँ बजारय् प्रचण्डपिं नाप सहमति जूगु खँ पित महसे मात्रै मन्त्री व मन्त्रालयया खँ पितहयाः भ्रमबीत स्वःगु प्रष्ट दु । जनविद्रोहया लाइन मत्वःतेगु व थुकिया नितिं माःगु ज्याभ्mवःत दयेकेगु सहमतिया खँय् चुपचाप दु । थुकिं छु खँ स्पष्ट जुइ धाःसा संस्थापन पक्ष वैद्य – थापा समूहयात अलमलय् यानाः ई छ्यायेगु व उगु समूहया नेता व कार्यकर्तातय्त हायलकायल यानाः कित बिसुकः छ्वयेगु कित थःगु समूहलय् दुत कायेगु रणनीति छ्यलाच्वंगु खनेदु । थुकियात गुलि फत उलि याकनं थुइकाः क्रान्तिया रक्षा यायेमाःगु दु । अवसरवादी व आत्मसमर्पणवादीतय्त सतक दथुइ नांगा यायेमाःगु आवश्यकता जूगु दु ।

More Stories Like this