व्यापारी अपहरणया द्वपनय् पुलांम्ह मन्त्री गुप्तायात प्रहरीं ज्वन
येँ (झीगु स्वनिगः)
पुलांम्ह मन्त्री श्यामसुन्दर गुप्तायात म्हिगः सोमवाः भैरहवा लागां प्रहरीं गिरफ्तार याःगु दु । सद्भावना पार्टी (आनन्दीदेवी) या नायः नापं सभासद् गुप्तायात व्यापारी अपहरणया द्वपनय् अथे गिरफ्तार याःगु खः । अनया सिद्धार्थ नगरपालिका वडा नं. ५ या बैंक रोडलागाय् च्वंगु थःगु हे निवासं अथे पुलांम्ह मन्त्री गुप्तायात ज्वंगु खः । व्यापारी पवन सांघाइया अपहरणय् संलग्न जूगुलिं महानगरीय प्रहरी अपराध महाशाखापाखें वंगु प्रहरी पुचलं वय्कःयात अथे ज्वंगु खः । अथे पुलांम्ह मन्त्रीयात ज्वंगु घटनायात कयाः प्रहरीं पूवंक जानकारी ब्यूगु मदुनि ।
