माओवादीं माघ ५ गतेनिसें जनपरिचालन याइगु
फागुन १ गते च्यागू थासय् जनसभा
येँ (झीगु स्वनिगः)
एकीकृत नेकपा (माओवादीं) शान्ति व जनसंविधानया नित्रिं धकाः थ्व हे वइगु माघ ५ गतेनिसें जनपरिचालन याइगु जूगु दु । जनपरिचालनया झ्वलय् माघ ५ गतेनिसें माघ २० गते तक देय्न्यंकं प्रशिक्षण ज्याझ्वः याइगु जूगु दु । माओवादीं फागुन १ गते देय्या मूमू च्यागू थासय् सभा याइगु जूगु दु । उगु जनसभाय् केन्द्रीय पदाधिकारीतय्सं न्वंवानादीगु ज्याझ्वः तकं तयार याःगु दु ।
शान्ति प्रक्रिया न्ह्याकेत नापं संविधान च्वयेगु नितिं एकीकृत नेकपा (माओवादी)या शीर्ष नेतातय्गु दगुइ जूगु वैठकं उगु कथं जनपरिचालनया निर्णय याःगु खः ।
पार्टीया नायः पुष्पकमल दाहाल प्रचण्ड निवासय् नायः प्रचण्ड, बरिष्ठ न्वकु मोहन बैद्य किरण, मूछ्याञ्जे रामबहादुर थापा बादल, छ्याञ्जे पोष्टबहादुर बोगटी नं सहभागी जुयादीगु दु ।
माओवादीया उगु बैठकय् राष्ट्रिय सहमतिया सरकारया बारे नं सहलह जूगु खः धकाः धाःगु दु । माओवादीया आइतवाः जक क्वचाःगु केन्द्रीय कमिटीया बैडठकं शान्ति व संविधानया नितिं जनपरिचालन यायेगु धकाः निर्णय याःगु खः ।
माओवादी दुने लाइन संघर्षया झ्वलय् पार्टीया नायः पुष्पकमल दाहल प्रचण्ड व बरिष्ठ नेता मोहन बैद्य किरणं न्ह्यब्वयादीगु व्यागलं व्यागलं राजनीतिक प्रतिवेदनयात धाःसा पार्टीया कार्यकर्तातय्थाय् यंकाः बहस याइगु जूगु दु ।
