इतिहासया पुखुलिं पिहां वयेमाल
शाक्य सुरेन
इतिहासया क्रमय्
स्वनिगःया झी नेवाः,
झीगु म्हसिका
कलाकारया क्यानभास,
च्वमिया ग्वरः,
प्रजापतिया न्हायातःगु चा थें
न्ह्याम्हेस्यां न्ह्याग्गु च्वःसां ज्यू,
न्ह्याम्हेस्यां न्ह्याग्गु बां लुइकूसां ज्यू ।
महाचीनया महामंजुश्रीं खड्गं पालाः,
लः पित छ्वय् धुंकूसां
झी स्वनिगःया सरोबर,
झी स्वनिगःया पुखू ।
गन -
किराँती जुजुं,
लिच्छवी जुजुं,
मल्ल जुजुं,
शाह जुजुं,
थःगु सभ्यता, संस्कृति व मान्यताया रंग
प्वंकल ।
बुद्धया शान्ति सन्देश,
पंचमकारया पंचतत्व व
हिन्दू वर्णाश्रमया वर्ण विविधताया रंगं
पुखू जायेकल ।
झी थनया
मेपू, सापू, ह्यँपू व ज्यापू ।
झी थनया आदिवासी ।
जुजुपिनिगु पहिचानया नितिं
इमिगु अभिमानया नितिं
गुगु धर्म,
गुगु कर्म,
गुगु संस्कार झीत बिल खः,
झीसं शालीनकथं नाला कया ।
गुकथं प्याखं ल्हू धाल - ल्हुया,
गुकथं बाजं था धाल - थाना,
गुकथं रथ सा धाल - साला ।
शासकतसें झीत यो यो थें
बां लुइकल ।
माःमाःकथं ज्यावः याना छ्यल ।
झीपिं न्ह्याबलें जुजुया प्रजा जक जुया,
तर बिडम्बनाया खँ,
झी गुबलें जुजु मजुया ।
झी कतःपित जक जुजु याये सःपिं,
थः जुजु जुइ मसःपिं ।
झी कतःपिसं ब्यूगु सभ्यता व संस्कृतिइ
थःगु पहिचानया आत्मरति यानाच्वनापिं ।
आः थ्व आत्मरतिं
झी मोहभंग जुइमाल ।
संस्कृति -
यचुगु जः जक मखु,
ध्याचः नं खः ।
सबलता जक मखु,
कमजोर नं खः ।
एकता जक मखु,
बिविधता व बिभाजन नं खः ।
उकिं,
झी आः इतिहासया पुखुलिं पिहाँवयेमाल,
न्हूकथं धाः थायेमाल,
न्हूकथं रथ सालेमाल,
न्हूगु सः पिकायेमाल,
न्हूगु गन्तब्यय् थ्यंकेमाल ।
झी इतिहासया पुखुलिं पिहाँवयेमाल ।
Related Stories
पित्याः प्याय्चाःया लागाMore Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
