चीन नेपाःया धात्थेंम्ह पासा खः

नेपालय् न्याघौ च्वनावंम्ह चीनया प्रधानमन्त्री वेन जिआबाओया भ्रमण नेपाःया नितिं तसकं उत्साप्रद जूगु दु । पूर्वाधार विकास, सीमा व्यवस्थापन, जलविद्युत उत्पादन लगायत विषयलय् नेपाःयात तःधंगु फाइदा जुइगु जूगु दु । थ्व नाप स्वाःगु अथेहे च्यागू सहमति पत्रय् नं ल्हाःचिं तयाः चीनया प्रधानमन्त्री वेनया भ्रमण नेपाःया नितिं सन्तोषजनक व फाइदाजनक जूवंगु दु । चीनं नेपाःयात दौत्य स्वापू तःसांनिसें निस्वार्थ व छम्ह इमान्दार जःलाखःलाया हैसियतं ग्वाहालि यानावःगु दु । थुगु ग्वाहालियात निरन्तरता बियावःसें भविष्य नं अज्ज अप्वः जूवनीगु खं निगू देय्या दथुइ स्वापू अज्ज क्वातुइगु खँय् शंका यायेथाय् मदु । नेपाःयात चीनं बियावःगु धेबाय् ३३ प्रतिशतं अप्वयेकीगु नं संकेट ब्यूगु खः । थुया न्ह्यः चीनं नेपाःयात १५ करोड युआनया ग्वाहालि बियावःगु चीनं थुगु दँनिसें २० करोड थ्यंकीगु जूगु दु । थ्व बाहेक वइगु स्वदँया दुने थ्व ल्याः थहांवनाः ७५ करोड थ्यनीगु नं प्रधानमन्त्री वेनं कनादीगु खः । प्रधानमन्त्री वेनं नेपाःलिसे च्यागू सहमति पत्रय् नं हस्ताक्षर यानादीगु दु । थुकी सम्झौतापत्र, सहमतिपत्र व लेटर अफ एक्स्चेन्स बारे जानकारी बियादीगु खः । सिंहदरबारय् निगू पक्षया दथुइ सहमति पत्रय् हस्ताक्षर जूगु खः । नेपाल सरकारं प्रधानमन्त्री वेनया थुगु भ्रमणयात ऐतिहासिक व सफल जूगु दाबी याःगु दु । प्रधानमन्त्री डा. बाबुराम भट्टराईं प्रधानमन्त्री वेनयात त्रिभुवन अन्तर्राष्ट्रिय विमानस्थलय् वनाः लसकुस व बिदाई याः वंगु खः । प्रधानमन्त्री भट्टराईं वर्तमान शान्ति प्रक्रियायात कयाः जानकारी बियादीगु खःसा वेनं उगु ज्या याकनं क्वचायेके फयेमा धकाः भिंतुना नं बियादीगु खः ।

निम्ह प्रधानमन्त्रीया दथुइ तिब्बतया सीमानांनिसें येँय्तक्क रेल सेवा न्ह्याकेगु व थुयालिपा लुम्बिनीतक्क थ्यंकेगु खँय् सहलह ब्याकूगु खः । अथेहे नेपाःया जलविद्युत उत्पादन, पोखरा विमानस्थल व विशेष आर्थिक क्षेत्र दयेकेगु व व्यवस्थापन लगायत ख्यलय् चीनं ग्वाहालि याइगु जूगु दु । भ्रमण लिपा प्यंगू पौया छगू मंकाः प्रेस विज्ञप्ति पितबिसें निगू देय्या दथुइया कूटनीतिक स्वापूयात कयाः समीक्षा यानातःगु खः । अथेहे त्रिशुली – ३ ए जलविद्युत आयोजना दयेकेगु नितिं चीनं सहुलियत त्यासा बीगु व पोखराया विमानस्थल दयेकेत नं चीनं माःगु ग्वाहालि याइगु खँ न्ह्यःथनेगु ज्या जूगु खः ।

चीनिया लगानी दुहांवल धाःसा सहुलियतपूर्ण ग्वाहालि बीगु व वहेकथं व्यवहार जुइगु नं धयातःगु खः । अथेहे विपा सम्झौता यायेत नं निगू पक्षं राजी जूगु दु । नेपाल प्रहरीयात माःगु सामान न्यायेत १ करोड युआन व सशस्त्र प्रहरीया क्षमता अप्वयेकेत ४ लख युआन धेबा बीगु खँय् नं सहमति जूगु धाःगु दु । निगू देय्या सीमानाय् ३० किलोमिटर जग्गाय् स्थानीय मनूतय्त दुथ्याकाः चरण क्षेत्र दयेकेत्यंगु दु । बन्दरगाह व्यवस्थापन समझदारीइ सीमा क्षेत्रया खुगू बन्दरगाहयात विकास याइगु जूगु दु । थुकी स्वंगूयात अन्तर्राष्ट्रिय स्तरयागु दयेकीगु जूगु दु । अथेहे येँया चक्रपथयात विस्तार यायेगु, बुद्धिजीवीतय्त चाःहीकेगु, अन्तर्राष्ट्रिय विषयलय् समान दृष्टिकोण दुगु लगायत खँय् नं विज्ञप्तिइ न्ह्यःथनातःगु खः । चीन नेपाःया धात्थेंम्ह पासा खः । चीनया प्रधानमन्त्री वेनया थुगु भ्रमणयात अति गोप्य याःगु खनेदु । नेपाःदुने च्वनाच्वंपिं फ्रि तिब्बतया हिमायतीतय्सं वेनया भ्रमणयात कयाः विरोध प्रदर्शन यायेपैmगु आशंकां थुकथं अति गोप्य यानातःगु खः । शनिवाःया भ्रमणयात कयाः प्रहरीयात हे शुक्रवाः बहनी जक पत्र छ्वःगु अनुमान याःगु खः ।

वेनया भ्रमणयात थुगु कथं गोप्य यायेमाःगु कारण नेपालय् च्वनाच्वंपिं २२,००० तिब्बतीयनत खःसा थुमिगु पाखें राज्य चिन्तित व विश्वस्थ जुइमज्यू । थुमिसं थः धर्मगुरु दलाई लामायात जुजु वा शासकया रुपय् मानय् यानाः येँया लाजिम्पाटं कूटनीतिक व प्रशासनिक ज्याखँत न्ह्याकावयाच्वंगु दु । थुमिसं छु हैसियतं ज्या यानाच्वन धयागु खँय् नेपाल सरकारतकं स्पष्ट मदु । चीनयात कयाः थुमिगु विरोध आन्दोलनया छुं हे औचित्यता मदु । थुमिगुपाखें ग्यानाः वेनया भ्रमणयात गोप्य यायेगु नेपाल सरकारया नितिं छगूकथं लाजमर्दो विषय खः ।

More Stories Like this