केन्द्रीय समितिया बैठक क्वचाल

सहमतिया आधारय् न्ह्या वनेगु

येँ (झीगु स्वनिगः)

म्हिगः एकीकृत नेकपा माओवादीया केन्द्रीय समितिया बैठक म्हिगः च्वना क्वचाःगु दु ।
बैठकय् पार्टीया नायः पुष्पकमल दाहाल व वरिष्ठ न्वकु मोहन वैद्य किरणया प्रस्तावयात छगू हे दयेकाः न्ह्या वनेगु धाःसां बैठकय् अन्त्यय् सहमतिया आधारय् जक पार्टीयात न्ह्याकीगु जूगु दु । थुया दथुइ माओवादी पार्टी छुं नं हालतय् तमज्याइगु धयादीगु खः । वय्कः नं – ‘जिमिगु पार्टीदुने छुं सैद्धान्तिक मतभेद दःसां नं पार्टी तमज्याइगु स्थिति थ्यंक धाःसा मखु ।’ रोल्पाय् जूगु छगू ज्याभ्mवःया दथुइ पार्टीया नायः प्रचण्डं धयादिल – ‘सम्भवत थौं हे च्वनीगु केन्द्रीय समितिइ मोहन वैद्य व जिगु प्रस्तावयात छगू हे यानाः न्ह्यःब्वयेगु जुइ ।’ पार्टीया केन्द्रीय समितिया बैठक दथुइ हे स्थगित यानाः केन्द्रीय समितिया छगू दर्जन नेतात म्हिगः छगः हेलिकोप्टरं रोल्पाय् थ्यंकः वंगु खः ।

दाहाललिसे अर्थमन्त्री वर्षमान पुन अनन्त, पोष्टबहादुर बोगटी, कृष्णबहादुर महरा, लोकेन्द्र विष्ट लगायत सभासद्तय्गु पुचः रोल्पा थ्यंकूगु खः । विवादया खँयात सहलह यायां न्ह्या वनेगु व आःयात स्थायी पुचःया मुंज्या च्वना माःगु ज्याभ्mवः दयेकीगु जूगु दु । स्थायी पुचःया बैठक याकनं च्वनेगु धाःगु दु । आःयात जनपक्षीय संविधान दयेकाः न्ह्यःने वनेगु व यदि उगु कथंया जनसंविधान दयेके मबिल धाःसा जनसंघर्षया थीथी रुपयात न्ह्यःने यंकाः प्यंगू आधारया सिद्धान्तयात नालाः न्ह्यःने वनीगु जूगु दु । जनसंविधानया नितिं सुझाव संकलन यायेगु ल्याय्म्हतय्गु शक्ति परिचालन यानाः सतक, सरकार व संसद मार्फत संघर्ष न्ह्याकीगु जूगु दु । थुकिया नितिं जनस्वयंम सेवक परिचालन याइगु जूगु दु ।

थ्व बाहेक अपाङ्गतय्त तत्काल राहत बीगु व वेपत्ता परिवारया मागयात नं सम्बोधन याइगु जूगु दु । थ्व बाहेक साझा प्रस्ताव दयेकाः सहमतिया आधारय् न्ह्या वनेगु धइगु मुंज्याया स्प्रिटयात कयाः राजनीतिक विष्लेषकतय्सं लसकुस याःगु दु ।