चीनं नेपाःयात १० अर्ब ग्वाहालि बीगु

येँ(सन्ध्या टाइम्स)/चीनं नेपाःया भौतिक पूर्वाधार विकासया निंतिं न्हय्न्यागू करोड अमेरिकी डलर बराबरया आर्थिक ग्वाहालि बीगु जूगु दु। प्रधानमन्त्री डा. बाबुराम भट्टराई व चिनिया समकक्षी बेन जियाबाओ दथुइ द्विपक्षीय वार्ता लिपा चीनं नेपाःयात गुंगू अर्ब चय्छगू करोड तका आर्थिक ग्वाहालि यायेगु सझौता पतीइ ल्हाःचिं तयेगु ज्या जूगु खः।
अथे हे चीनं नेपाःयात स्वदँ दुने खुगू अर्ब बराबरया सहुलियपूर्ण त्यासा नं बीगु जूगु दु। निगू देय्या प्रधानमन्त्रीया उपस्थितिइ नेपाःयात आर्थिक ग्वाहालि, नेपाल प्रहरी व सशस्त्र प्रहरीया क्षमता अभिवृद्धिइ ग्वाहालि, सीमा क्षेत्रय् चरन सुविधा, सांस्कृतिक व कुटनीतिक आदान-प्रदान, सहुलियतपूर्ण त्यासा लगायत थीथी च्यागुलिइ सम्झौता जूगु खः। नेपालय् न्ह्यानाच्वंगु शान्ति प्रक्रियाय् ग्वाहालि जुइकथं छगू अर्ब ख्वीगू करोड तका नं ग्वाहालि याइगु जूगु दु। नेपाःया शान्ति प्रक्रियाया निंतिं चीनं माक्व ग्वाहालि यायेत तयार दुगु नं चिनिया प्रधानमन्त्रीं धाःगु दु। सम्झौता जूगु सांस्कृतिक आदान प्रदान व त्यासा व्यवस्थापनया निंतिं जक चीनं निगू त्या अर्बं मल्याक ग्वाहालि याइगु जूगु दु।
नापं चीन सरकारं नेपाःयात दँय्दसं बिया वयाच्वंगु न्यागू करोड युआनं अप्वयेकाः नीगू करोड तका ग्वाहालि बीगु जूगु दु।