घ्यःचाकु संल्हू व थीथी तीर्थय् मेला

माघ महिनाया दकलय् न्हापांगु न्हियात झीसं घ्यः चाकु संल्हू धकाः हनाच्वना। थुकुन्हुयात खय्तय्सं माघे संक्रान्ति व संस्कृतं मकर संक्रान्ति धाइ। अथे हे झिंनिगू राशि मध्ये झिंगूगु राशि मकर खः। सौर्य वत्सरया सौर मासकथं गुंगूगु राशि धनुं मकर राशीइ सूर्य सरय् जुइगुलिं थ्व संल्हूयात मकर संक्रान्ति धाइगु खः।
उकिं थौंया संल्हू मास हिली कथं मास संक्रान्ति जक मखु हेमन्त ऋतु सिधयाः थौनिंनिसें शिशिर ऋतु क्यनी कथं नं थ्व संल्हूयात ऋतु संक्रान्ति धाइगु खः।
न्हि चीहाः व चा तःहाः जुइगुलिं खय् ब्रम्हूतय्सं 'पुस फासफुस' नं धायेगु याः। थौंया दिंकुन्हुयात चीधंगु नखःया रुपय् ब्याहा जुइ धुंकूपिं म्ह्याय्मस्तय्त नखत्या सःतेगु चलन दु।
चिकुलां धइगु न्ह्यागुं वस्तु ख्वइगु ई खः। थुबलय् तःखा, न्याखुना आदियालिसें ठोस पदार्थ अथे कि घ्यः, चाकु नं नयेगु याइ। थुकुन्हु थःपिनि जक नयेगु मखुसे पितृयात नं घ्यः, चाकु, तरवल, तौला आदि तयाः सिरा बीगु याइ। थुकिया लिसें छेँखापतिं पुजाकुथी द्यःपिंत पुजा यायेबलय् नं घ्यः चाकु, हाम्वःगुलि छायेगु चलन दु। अझ ब्रम्हूतय्त दान बीगु �वलय् फुसा सिँ ह्यंग्वाः तयाः तौमकः नं गुलिं गुलिसिनं दान बिउ।
थुकुन्हु मेमेबलय् थें तःतामछि घासा ज्वरे यानाच्वनेम्वाः। घ्यः, चाकु, हाम्वः गुलि, तौला, पलः नयेगु याइसा गुलिसियां धाःसा थुकुन्हु माय् तयाः हलू जा थुयाः नयेगु याइ। विशेष यानाः थौंया संल्हूकुन्हु घ्यः चाकु नइगु जुयाः नं नसाया नामं थुगु संल्हूया नां घ्यःचाकु संल्हू जूवंगु अनुमान यक्वसिनं याः। गुलिं गुलिसिनं धाःसा थुकुन्हु शत्रुया छ्यं न्ह्ययेगु धकाः लाभाया छ्यं न्ह्ययेगु याइ। अझ विशेष यानाः थौंया संल्हू कुन्हु येँ व थिमिया स्वयां यलया पलः नयेमाः धाइपिं नं यक्व दु। थुकुन्हु बियाछ्वये धुंकूपिं म्ह्याय्मस्त थः छेँय् चिकं तिउ वइगु चलन दु। अले थौंया थ्व संल्हूकुन्हु थीथी तीर्थय् मेला नं न्ह्यानाच्वनी। तर थौंकन्हय् स्वनिगःया तीर्थ खुसिया लः दुषित जूगुलिं मनूत तीर्थ चाःहिलाः द्यःपिं दर्शन यानाः लिहां वयेगु याइ। तर नारायणी अञ्चलया देउघाट, त्रिशुली, काली गण्डकी व राप्ती ह्वंगु तीर्थ अले बागमती अञ्चलया देवीघाट, त्रिशुली ह्वंगु तीर्थय् वनाः द्यःपिनिगु पुजा दर्शन याः वनी। स्वनिगःया खँल्हायेबलय् थनया संखमूल, बागमती, मनहरा ह्वंगु तीर्थय् न्हापा मेला जुइगु खःसां नं थौंकन्हय् धाःसा मेला जूगु खने मदये धुंकल।
थौंकुन्हु घ्यः व चाकुलिसें हाम्वः गुलि नं नइगु जुयाः थनिंनिसें हाम्वः ग्वःछि न्हि ताहाया वनी धइगु जनविश्वास दु। गुलिसिनं धाःसा थिंला पुन्हिया यःमरिया च्वका बःछ न्हि ताहाइ नं धाः। तर पात्रोकथं थनिंनिसें २, २ व ३, ३ पला न्हि ताहाया वइ।

More Stories Like this