मवयाः आश्चर्य, वलं नं आश्चर्य !
चिनियाँ प्रधानमन्त्री वेन जिया बाओं थनिं लत्या न्ह्यः नेपाः भ्रमण आकाझाकां स्थगित यानाः गथे सकलें नेपाःमितय्त अजू चायेका बिउगु खः, आः नेपाः भ्रमण यानाः व स्वयां नं अप्वः अजूचायेका बिउगु दु। वय्कः म्हिगः मात्र न्याघौया लागिं नेपाः झायाः लिहां वन। चीन थेंज्याःगु विश्वया छगू शक्ति राष्ट्रया प्रधानमन्त्रीं नेपाः भ्रमण याःगु अथें नं छगू लसताया खँ खःसा थ्व भ्रमणया नापं तुं चीनं नेपाःया पूर्वाधार विकासया लागिं ७५ करोड डलर ग्वाहालि यायेगु धकाः बचं नं बिया थकूगुलिं भ्रमण नेपाःया लागिं 'उपलब्धीमूलक' नं जूगु दु। थुकियात नेपालं सफल भ्रमण धकाः दावी यात धाःसा उकियात मखु धाये माःगु अवस्था मदु। अथे खयां नं चिनियाँ प्रधानमन्त्रीं गुगु शैलीं नेपाःया भ्रमण याना वन, उकिं धाःसा आपालं कथंया कुटनीतिक न्ह्यसः थना बिउगु दु। चिनियाँ प्रधानमन्त्रीं थुगु शैलीया भ्रमण यानाः नेपाः, विश्व व खास यानाः भारतयात छु 'सन्देश' बीत स्वःगु दु धकाः मालेगु ज्या नं कुटनीतिक ख्यलं याःगु खनेदु। थ्व स्वयां न्ह्यः तक चिनियाँ प्रधानमन्त्रीं नेपाः छगू देशया जक औपचारिक यानाः नेपाःयात उच्च महत्व बीगु धकाः चर्चा जुयाच्वंगु खः। आः मेगु देश भ्रमणया झ्वलय् न्याघौया 'ट्रान्जिट आवर' जक छ्यायेत याःगु थ्व भ्रमणं चीनया मिखाय् नेपाःया स्थान गन दु धकाः क्यना बिउगु नं विश्लेषकतय् दावी दु। खतुं चिनियाँ प्रधानमन्त्रीं थुकथं भ्रमण यायेमाःगुया लिउने सुरक्षा, तिब्बती शरणार्थीतय् विरोध व स्वयम् वेनया निला जक ल्यं दनिगु कार्यकालयात नं क्यनेगु याः। अथे खःसां चीनलिसे नेपालं स्वापू अझ नं क्वातुके मगाःनिगु आभास थुकिं बिउगु दु।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
