स्वयम्भू ज्ञानमालाया चित्लांग यात्रा
येँ(सन्ध्या टाइम्स)/ज्ञानमाला भजन खलःया ग्वसालय् वंगु पुस ८ गते मुक्कं निसः व चय्म्ह चित्लाङ्ग यात्राया निंतिं वन। यात्राय् वंपिंत चित्लाङ्गया पिने च्वंगु ध्वाखाय् लसकुस याःगु खः। ध्वाखांनिसें तुपिखेलतक न्यासि वनाः चैत्य व बजाः चाःहिलेगु ज्या जूगु खःसा मैनमत र्याली नं न्ह्याकूगु खः।
बाजंलिसें अशोक चैत्य चाःहिलाः सभा क्वचायेकाः निघौ तक भजन हालेगु ज्या नं जूगु खः। थुकिया लिसें त्रिपुरेश्वर शिवालयतक लँ स्वानाः बुद्ध पुजालिसें धर्म देशना यानाबिज्यासें अशोक महाराजया बाखं नं कनेगु ज्या नं जूगु खः।
ज्याझ्वलय् स्वयम्भू ज्ञानमाला भजन खलःया अध्यक्ष, समितिया अध्यक्ष, मू पाहां नेवाः बलामि देय् थकालीपिं नं उपस्थित जुयादीगु खःसा ज्याझ्वलय् थीथी खलः पुचःतय्त हनापौ नं देछाःगु खः। खलःया उद्देश्यया बारे सुवर्ण शाक्यं ध्वाथुइकादीगु ज्याझ्वलय् थनं वंपिं धर्मपासापिंसं मुंकूगु चय्न्हय्द्वः तका दां अशोक चैत्य क्वसं ल्वहं सीगु ज्याय् छ्यलेगु जानकारी नं बिउगु खः। खलःया कजि प्रतिज्ञा शाक्यं सुभाय् न्वचु बियादीगु उगु ज्याझ्वलय् थीथी हुलाप्याखं नं न्ह्यब्वःगु खः।
