वेनया नेपाः भ्रमणं छु सन्देश बिल ?

येँ(सन्ध्या टाइम्स)/नेपाः भ्रमणय् वःम्ह चिनियाँ प्रमं म्हिगः गुगु शैलीया गोप्य, चीहाकःगु व कडा सुरक्षा दथुया भ्रमण यानादिल, थुकिं विश्वया न्ह्यःने छु सन्देश बी जुइ?
आः देय्या राजनीतिक व कुटनीतिक ख्यलय् थ्व सवालय् चर्चा सुरु जूगु दु। दकलय् न्हापां ला थुकिं चीन थेंज्याःगु विश्व शक्तिया नेतात भ्रमणय् वयेगु लागिं नेपाः अझ नं सुरक्षाया दृष्टिकोणं पाय्छि मजूनि धइगु छगू क्वातुगु थुकिं विश्वयात बी। विश्वया मेपिं नेतातय्त नेपाः वयेगु पाखें थुकिं हतोत्साही याइ।
चिनियाँ पक्षं नेपाःया सुरक्षायात अविश्वास याःगु छता कारण छु नं जुइफु धाःसां नेपालं चीनयाके थुगुसी छु छु ख्यलय् ग्वाहालि माल धकाः इनाप याःगु खः, व स्वयाः नं चीनं नेपाःया सुरक्षा निकायया हविगत अनुमान यात जुइमाः। सशस्त्र प्रहरी व जनपद प्रहरीया लागिं चीनं गुकथंया ग्वाहालि बिउगु खः, उकिं हे नेपाली सुरक्षा निकायया सक्षमता पुष्टि याः। उकिं सुरक्षाया कारण क्यनाः गोप्य रुपं वःम्ह चिनियाँ प्रधानमन्त्रीं नेपाःया सुरक्षा निकाययात गुगु ग्वाहालि बियादीगु खः, उकिया गुह्य अर्थ नं थनया नेतातय्सं थुइकेमाःगु खनेदु।
उपप्रम लिसें गृहमन्त्री विजय गच्छदार सुरक्षा निकायया प्रमुखत सहित चीन वनाः नेपालय् वेनया पूरा सुरक्षा जुइ धकाः आश्वस्त याः वंगु खः। तर चीनं उकियात पत्याः मयात। आः जक मखु भचा लिपा तकं उकियात चीनं पत्याः याये मफइगु खँ पुलिसयात वय्कलं बियादीगु ग्वाहालिपाखें अनुमान यायेफु।