तिथि पियाच्वंगु ला मनू हे थ्यंकः वल

चिनियाँ प्रमया नेपाः भ्रमण
येँ(सन्ध्या टाइम्स)/वंगु पुस ५ गते नेपाः वयेमाःम्ह चिनियाँ प्रधानमन्त्री वेन जियाबाओया भ्रमण आकाझाकां स्थगित जुइवं भ्रमणया मेगु तिथि क्वःछीगु निंतिं नेपाः व चीनया कुटनीतिक च्यानल दथुइ खँ हे जुयाच्वंगु तिनि। नेपाः ला चीनपाखें न्हूगु तिथि वइ धकाः पियाच्वंगु, तर वःबलय् तिथि मखु प्रधानमन्त्री थः हे वया बिउबलय् नेपाः सरकार लसता स्वयां नं अप्वः इतःमितः कन।
मुक्कं न्याघौया लागिं नेपाः झाःम्ह चिनियाँ प्रधानमन्त्री वेन जियाबाओ वइगु जुल धइगु खबर नेपाःयात म्हिगः तिनि प्राप्त जुलसा चीनं थुकिया औपचारिक जानकारी ला थौं न्हिनय् जियाबाओया विमान नेपाःया भूमिइ दिकेधुंकाः तिनि बिल।
वय्कःयात लसकुस यायेगु लागिं इपांथिपां मदयेक ब्वाँय् जुइमाःपिं सिंहदरवारया गुलिखे कर्मचारी म्हिगः छेँय् तकं वने मखं। जियाबाओ एअरपोर्टं तप्यंक सिंहदरवार, सिंहदरवारं राष्ट्रपति भवन व अनं हानं तप्यंक एअरपोर्ट हे थ्यंकः वंगु खः। थुलि यानाः मुक्कं प्यघौत्याया दुने वय्कःया 'औपचारिक' नेपाः भवन सम्पन्न जुल। वय्कःया थ्व भ्रमण औपचारिक स्तरयागु जुइ धकाः नेपाः सरकारयात तकं घौछि न्ह्यः तिनि जानकारी बिउगु खः।
वय्कःया भ्रमणयात गोप्य जक मखु सुरक्षाया ल्याखं नं उतिकं हे कडा याःगु खः। वय्कःया व्यक्तिगत सुरक्षाया जिम्मा नेपाली सेनायात बिउगु खःसा पिने सुरक्षा बीगु लागिं सशस्त्र प्रहरीया ४५० म्ह कमाण्डो परिचालन याःगु खः। वय्कः च्वना वःगु गाडीयात मेगु झिंखुगः गाडीं सुरक्षा बियावःगु खः। एअरपोर्टं सिंहदरवार वनेगु लँय् मनूतय्त न्यासि तकं वने मबिउगु खःसा वय्कः येँय् च्वनाच्वंत्तले सिंहदरवारंनिसें शितल निवास तकया लँपु पूर्ण रुपं बन्द याःगु खः। थुकिं यानाः लँय् गाडी गयाः जुइपिंत तःधंगु सास्ती जुल।
थ्व सुरक्षा खास यानाः वय्कःया भ्रमणया विरोधय् तिब्बती शरणार्थीतय्सं प्रदर्शन यायेफु धकाः बिउगु खः। थ्व झ्वलय् प्रहरीं म्हीग व म्हिगः सुथय् समेत यानाः ३५० म्ह तिब्बती शरणार्थीतय्त ज्वंगु खः। उमित म्हिगः सनिलय् वेन लिहां वनेवं तिनि त्वःतल।
वेनं नेपाः भ्रमणया झ्वलय् नेपाःयात ७५ करोड ग्वाहालि यायेगु बचं बिया थकल। लिसें नेपाःयात दँय्दसं ग्वाहालि कथं बीगु दां नं थ्व दँनिसें २ अर्ब तका याना बिल। भारतं नेपाःयात दँय् १ अर्ब भारु ग्वाहालि बियाच्वंगु दु।
थःगु नेपाः भ्रमणया झ्वलय् चिनियाँ प्रम वेन जियाबाओं नेपाःया फुक्कं राजनीतिक दलया नेतातय् न्ह्यःने दनाः भारतया सवालय् धाःसा छगू अजूचायापुगु खँ धया थकल। वय्कलं थौंकन्हय् चीन व भारतया स्वापू बांलानाच्वंगु दु उकिं नेपालं नं भारतलिसे स्वापू बांलाकि, भारतलिसे स्वापू बांलाकल धकाः चीनं आपत्ति तायेकी मखु धयादिल। माओवादी अध्यक्ष प्रचण्ड समेत दुगु थासय् वय्कलं धयादीगु थ्व खँ विशिष्ट अर्थ दुगु खँ थन धयाहःगु दु।
चिनियाँ प्रम विमानस्थलय् थ्यंबलय् अन नं बांलाक स्वागत मजुल। वय्कः खुरुखुरु न्ह्यःने वयाः प्रधानमन्त्री डा. बाबुराम भट्टराईलिसे ल्हाः मिले यायेत्यंबलय् क्यामेराया न्ह्यःने मलात। फोटो काये मखनी धकाः हतरपतर परराष्ट्रया शिष्टाचार महापाल मुक्तिनाथ भट्टं चिनियाँ प्रमया ल्हाः हे ज्वनाः सालाः क्यामेरापाखे स्वका बिल।