‘सरकारप्रतिया विश्वास म्हो जूगु दु’

नुवाकोट (झीगु स्वनिगः)

नेपाली कांग्रेसया केन्द्रीय दुजः डा. रामशरण महतं चीनियाँ प्रधानमन्त्री बेन जिआवाओया आकस्मिक व चीहाकःगु भ्रमणं नेपालय् शान्ति सुरक्षा अस्तव्यस्त दुगु प्रमाणित जूगु धयादीगु दु । बट्टारय् म्हिगः लायन बचत लिसे ऋण सहकारी संस्थाया प्यक्वःगु वार्षिक साधारणसभा लिसे भवन उलेज्या ज्याभ्mवःया नितिं झायादीम्ह डा. महतं पत्रकारपिंलिसे खँल्हाबल्हा यानादिसें थ्व स्वयाः न्ह्यः सरकारया हे कारण लच्छि न्ह्यः जिआवाओया भ्रमण स्थगित जूवंगु दाबी यानादिल ।

वर्तमान सरकार कूटनीतिक मामलाय् असफल दुगु धयादिसें डा. महतं विदेशीत दथुइ वर्तमान सरकारया विश्वास नापं म्हो जूगु धयादिल । थुपिं फुक्क घटना परिघटना एकीकृत माओवादीया दोधारे प्रवृतिया कारण जूगु नापं डा. महतया धापू खः ।
सेना समायोजन विशेष समितिया दुजः नापं जुयाच्वनादीम्ह डा. महतं माओवादी लडाकुया स्वेच्छिक अवकाश व समायोजनया विषय न्ह्यःने न्ह्यानाच्वंगु इलय् अनेक शर्त न्ह्यःने न्ह्याकाः एकीकृत माओवादीं न्ह्यानाच्वंगु शान्ति प्रक्रियायात पंगः थनेत स्वःगु धयादिल । डा. महतं नेपाली सेनाया मापदण्ड, नीति व प्रक्रिया कथं माओवादी लडाकुया योग्यता व क्षमताया आधारय् धेंधेंबल्लाःपाखें समायोजन याइगु नापं न्ह्यःथनादिल ।