न्याघौ च्वनाः वेन लिहांवन

विरोधया आशंकां भ्रमण गोप्य

येँ (झीगु स्वनिगः)
म्होनिं च्यागू समझदारी पत्रय् ल्हाःचिं तयाः चीनया प्रधानमन्त्री वेन जियाबाओलिसे वय्कः नाप वःगु प्रतिनिधि मण्डल म्हिगः हे लिहांवंगु दु । वय्कःपिंत प्रधानमन्त्री डा. बाबुराम भट्टराईं विमानस्थलय् बिदाइ ब्यूगु खः । न्याघौया भ्रमणय् झायादीम्ह चीनया प्रधानमन्त्री वेनं शितल निवासय् वनाः राष्ट्रपति डा. रामवरण यादव नापलाः झाःगु खः ।
सिंहदरबारय् न्हिनसिया भ्वय् नयाः वय्कः तप्यंक शितल निवास झायादीगु खः ।

राष्ट्रपति डा. यादव नाप वेनं १५ मिनेट औपचारिक खँल्हानादीगु सीदुगु दु । चीनिया प्रधानमन्त्री वेनं नेपाः नाप याःगु च्यागू सम्झौताकथं नेपाःयात न्ह्यन्यागू करोड अनुदान ग्वाहालि बीगु जूगु दुसा नेपाःया शान्ति प्रक्रियाय् ग्वाहालि यायेगुकथं थप निगू करोड अप्वयेकाः थुसीया आर्थिक बजेट नीगू करोड थ्यंकीगु खँ नं वेनं धयादीगु खः ।
वनेया भ्रमणयात ध्यानय् तयाः नेपाल सरकारं सुरक्षा व्यवस्था तसकं क्वातूगु खः । प्रधानमन्त्री वेन हवाइजहाजं कुहांवयाः सिंहदरबार गेटतक्क द्वलंद्वः सुरक्षा प्रहरीं सुरक्षा ब्यूगु खः । यातायात पूर्णत बन्द यानाः लँय् वंपिंत तक्कं सुरक्षा जाँच याःगु खः ।
मू सतकं २०० मिटर पिने प्रहरीत तःगु खःसा चुक चुकय् नेपाल प्रहरी व सशस्त्र प्रहरीत तःगु खः । अथेहे सिंहदरबारंनिसें शितल निवासतक्क नं यातायात व्यवस्था दीकूगु खः ।

स्वतन्त्र तिब्बतया नारा लगायतया तिब्बतीतय्सं विरोध प्रदर्शन याइगु आशंकां व्यापकरुपं प्रहरी परिचालन याःगु खः । तर अपरझत जूगु वेनं भ्रमणयात कयाः नेपालय् दुपिं तिब्बतीतय्सं थुकिया विषयलय् सीके मपूmगुलिं हे विरोध प्रदर्शन यायेमपूmगु अनुमान याःगु दु । थुया न्ह्यः वेनया भ्रमण सुरक्षाया कारणं हे रद्द जूगु खः । अबले कूटनीतिक ज्याखँ नं मिलय् मजूगु व सुरक्षा व्यवस्था नं मिलय् मजूगुलिं अबलेया भ्रमण रद्द जूगु खः । वंगु वेनया भ्रमणया समाचारयात सञ्चार ख्यलय् वयेवं नेपालय् च्वनाच्वंपिं नीनिद्वः तिब्बतीयनतय्सं थःपिनिगु गतिविधि अप्वयेकूगु खः । उखुन्हु तिनि थीथी थासं येँय् वयेत्यंपिं गुइम्ह तिब्बतीयनतय्त थानकोटय् ज्वंगु खः ।