वैद्यया उपगुटं यानाः समस्या

थौं माओवादीं अन्तिम निर्णय याइगु सम्भावना

येँ (सन्ध्या टाइम्स)/माओवादी दुने सहमति जुइधुंकूगु विवादत नं हानं हानं पिलू वयाच्वंगुया कारण उगु पार्टीया असन्तुष्ट उपाध्यक्ष मोहन वैद्य गुट दुने नं थीथी उपगुट दुगुलिं खः धाःगु दु। वैद्य गुट दुनेया मेमेगु उपगुटया कारणं हे पार्टीया विवाद ज्यंकेत थाकुयाच्वंगु द्वपं माओवादीया प्रचण्ड व बाबुराम गुटं बियाहःगु दु ।

छुं ई न्ह्यः तिनि अध्यक्ष प्रचण्ड व मोहन वैद्य दथुइ जूगु वार्तां निगुलिं पक्षया खँयात कःघानाः न्हूगु हे राजनीतिक प्रस्ताव तयार यायेगु व डा. बाबुराम भट्टराईया सरकारय् वैद्य पक्षयात यःयःगु मन्त्रालय बियाः दुकायेगु धकाः सहमति जूगु खः। तर वैद्य व प्रचण्ड जानाः मिले जुइधुंकूगु थ्व खँयात आः सीपी गजुरेलं वयाः अस्वीकार यायेवं हानं समस्या पिहां वःगु दु। उखे नेत्र विक्रम चन्दं नं जनविद्रोहया लाइनयात त्वःतेगु खँ हे जुइ मखु धकाः अडान कयाहःगु दु। थुकिं यानाः समाधान हे जुइत्यंगु विवाद नं हानं पिलू वःगु खः। वैद्य गुटं प्रम बाबुरामं राजीनामा मयाःतले सहमति जुइ मखु धया हःगुलिं विवाद हानं थाति लाःगु खः ।

विवादं यानाः पार्टी केन्द्रीय कमिटीया बैठक च्वनेगु नं अनिश्चित जूवंगु दु। थ्व बैठक थौंकन्हय् स्थगित जुयाच्वंगु दु। विवाद ज्यंकेत न्हापां पदाधिकारीतय्गु बैठक निं च्वनेगु धाःगु खःसां म्हिगः पार्टीया सल्लाहकार भक्तबहादुर श्रेष्ठ मदुगुलिं उगु बैठक मच्वंगु खः। पदाधिकारीतय्गु बैठक थौं च्वनेगु धाःगु दुसां थौं नं च्वनीगु धाःसा अझ नं निश्चित मजूनि। माओवादीं विवादं यानाः देय्या शान्ति प्रक्रिया तकं अवरुद्ध जुयाच्वंगु दु ।

ध्यबा मदयाः दुजःतय्त मर्का
राजधानीइ न्ह्यानाच्वंगु माओवादीया केन्द्रीय बैठकय् ब्वति कायेत येँय् वयाच्वंपिं पिने जिल्लाया दुजःत बैठक ताःहाकः जुया वंलिसे खर्च मगाना वःगुलिं चिन्तित जूगु दु। येँय् छेँ वा थःथिति मदुपिं पिने जिल्लाया केन्द्रीय दुजःत बैठक ताःहाकः जुया वंगुलिं होटल व जा नयेत ध्यबा खर्च यायां हैरान जुया वःगु खँ धाःगु दु। थःपिंसं ध्यबा ज्वना वःगु ध्यबा खर्च जुया वंगु व पार्टीं नं छुं कथं ग्वाहालि मयाःगुलिं थःपिं न च्वनेगु न वनेगु अवस्थाय् लानाच्वंगु खँ उमिसं धाःगु दु। छखे बैठक ताःहाकः जुयाच्वंगु व मेखे स्थगित जूगु बैठक गबले च्वनी धइगु खँ हे ठेगान मदयाः झन हे समस्या जूगु खँ नं उमिसं धाःगु दु। पिनें वयाच्वंपिं नेतात मध्ये नं प्रचण्ड अथवा मोहन वैद्यया गुटय् स्पष्ट रुपं लगे जूपिं नेतातय्त उलि समस्या मदुसां तटस्थ दुजःतय्त तःधंगु समस्या दुगु खँ धाःगु दु ।