स्वीट्जरल्याण्डय् न्हय्न्हु तक सहलह न्ह्याःगु खः

स्वीट्जरल्याण्ड बैठकया सहजकर्ता पद्मरत्न तुलाधरं धयादी -

येँ (सन्ध्या टाइम्स)/राज्यया शासकीय स्वरुपयात कयाः स्वीट्जरल्याण्डय् तःधंगु स्वंगू दल व मधेसी दलतय् दथुइ जूगु सहमतियात कयाः थौंकन्हय् कांग्रेस नेता रामचन्द्र पौडेलं न्ववाना हयाच्वंगु खँ न्यनाः भाजु पद्मरत्न तुलाधरं आश्चर्य प्वंकादीगु दु। तःधंगु दलतय् दथुइ स्वीट्जरल्याण्डय् उगु बैठकया तारतम्य भाजु तुलाधरं हे मिले यानादीगु खः ।

थौं 'सन्ध्या टाइम्स'लिसे खँ ल्हासें भाजु तुलाधरं धयादिल, 'खतुं स्वीट्जरल्याण्डय् जूगु उगु बैठक गोप्य खः। माओवादी, कांग्रेस, एमाले व मधेसवादी दलया स्वम्ह स्वम्ह प्रतिनिधि दुथ्याकाः स्वीट्जरल्याण्डय् न्हय्न्हु तक सहलह यानाःलि अन्तय् स्टकबोन धाःथाय् थ्व सम्झौता जूगु खः ।'

वय्कलं धयादिल, 'माओवादीपाखें डा. बाबुराम भट्टराई व अनन्तयात यंकेगु धकाः सुरुइ खँ ल्हानागु खःसां लिपा वय्कःपिनि मलाःगुलिं लीलामणि पोखरेल व खिमलाल देवकोटायात यंकागु खः। कांग्रेसय् थीथी गुट दुगुलिं कोइराला गुटया प्रकाशमान सिंह, देउवा गुटया विमलेन्द्र निधि व तटस्थ च्वनादीम्ह अर्जुन नरसिंह केसीयात यंकागु खः। आः केसीं सम्झौता जूगु हे खः धकाः न्ववाःगुलिं पौडेल ला थः हे जोकर जुल नि ! थःगु पार्टीया महामन्त्री थेंज्याःपिं नेतात हफ्तौं पिने वनाच्वंगु खँ हे मसिउम्ह वय्कः गज्याःम्ह उपसभापति?'

स्वीट्जरल्याण्डं लिहां वयेधुंकाः एमालेया भीम रावल व माओवादीया खिमलाल देवकोटापिंसं थ्व खँ थःथःपिनि पार्टीइ ब्रिफिङ यानादीगु जानकारी नं वय्कलं धयादिल। कांग्रेसपाखें धाःसा विमलेन्द्र निधिं स्वीट्जरल्याण्डय् अज्याःगु सहमति जूगु खःसां देशय् माओवादीं नं आपालं सहमतित त्वाःथःगु कारणं थःपिंसं नं शासकीय स्वरुप सम्बन्धी स्वीट्जरल्याण्डया सहमतियात अस्वीकार यायेधुन धकाः जानकारी बियादीगु खँ नं भाजु तुलाधरं कनादिल ।

स्वीट्जरल्याण्डय् स्वंगू तःधंगु दल व मधेसी दलतय् दथुइ शासकीय स्वरुपया बारे राष्ट्रपति व प्रधानमन्त्री निम्हेसितं अधिकार वनीगु कथंया मिश्रित प्रणाली नालेगु सहमति जूगु खः ।