एमाले: पार्टी एकता लाकि ब्राम्हण एकता?
येँ (सन्ध्या टाइम्स)/विपक्षी पार्टी एमालेय् सुरु जूगु पार्टी एकताया अभियानय् देयन्यंकं ब्रम्हू नेतातय्त जक संवोधन याकेगु ज्या जूगु खँय् अन दुनेया जनजाति नेतातय्सं असन्तुष्टि प्वंकूगु दु।
एमाले एकता अभियानया न्हापांगु ज्याझ्वः थौं पूर्वया झापाय् जुयाच्वंगु दु। युवा संघया ग्वसालय् अन जुइगु सभाय् एमालेया नेता झलनाथ खनाल, माधव नेपाल, केपी ओली, वामदेव गौतम व ईश्वर पोखरेलं संवोधन याइगु ग्वसाः दु। पार्टी दुने नेतातय् दथुइ एकता कायम जुइधुंकाः एमाले छप्पँ जुइधुंकल धइगु सन्देश व शक्ति क्यनेगु ल्यां थ्व ज्याझ्वः याःगु खः। ज्याझ्वलय् ब्वति कायेकेगु लागिं ४०० गः गाडीं मनू ल्ह्यःगु दु। एमालें आः देय्न्यंकं हे स्वला तक थज्याःगु एकता सभात याइगु खँ सीदुगु दु ।
तर थज्याःगु एकता सभाय् ब्रम्हू नेतातय्त जक न्ववाकेगु ग्वसाः यानाच्वन धकाः एमालेया जनजाति नेतातय्सं असन्तुष्टि प्वंकूगु दु। एमालेया छम्ह जुझारु जनजाति नेतां न्ह्यसः तयादिल, 'थ्व पार्टी एकता खः लाकि ब्राम्हण एकता खः?'
एमालेया जनजाति सभासद्तय्सं छुं ई न्ह्यः राज्य पुनर्संरचना समिति सम्बन्धी संविधान संशोधन असफल यायेवं एमालेय् जातीय ध्रुवीकरण तच्वया वःगु खः ।
