माओवादी विवादय् पदया खँ

माओवादी दुने ज्यन धकाः ढुक्क जुइधुंकूगु विवाद हानं पिहां वःगु दु। पार्टी अध्यक्ष प्रचण्डं असन्तुष्ट उपाध्यक्ष मोहन वैद्यया बिचाःयात समेत समावेश यानाः न्हूगु हे राजनीतिक प्रस्ताव तयार यायेगु व उखे सरकारय् नं वैद्य पक्षयात समेत दुथ्याकाः राष्ट्रिय सरकार दयेकेगु धकाः जूगु सहमतियात वैद्य गुटया हे मेपिं नेतातय्सं अस्वीकार यायेवं समस्या हानं मज्यनीगु अवस्थाय् थ्यंगु खः। पार्टीया राजनीतिक प्रस्तावय् सहमति जूसां सरकारया नेतृत्व यायेगु सवालय् कचवं पिहां वःगुलिं माओवादीया थ्व कचवं छुं भचा सत्तालिसे हे स्वानाच्वंगु दु धइगु आभास नं पिने जूगु दु। सत्ताया लागिं नेपाली कांग्रेस, एमाले दुने तःक्वःमछि ल्वापु जूगु जक मखु पार्टी हे कुचा दला वंगु समेत इतिहास दुगु सन्दर्भय् माओवादी दुने नं अज्याःगु हे ल्वापु जुल धाःसा थ्व पार्टीयात नं पदया लोभय् लुकुं बित धइगु अःपुगु द्वपं वइगु सम्भावना दु। माओवादी दुने असन्तुष्ट वैद्य पुचलं हानं जनविद्रोह हे यायेमाः धइगु लाइन पित बीवं सर्वसाधारण जनता छक्वः थारान्हूगु खः। आः पार्टीया आन्तरिक कचवं मिले यायेगु नामय् वहे गुटया सुं नेतायात प्रधानमन्त्री दयेकेगु धकाः प्रस्ताव तयेबलय् प्रस्ताव तइम्हेसिया नियतय् समेत शंका जुइगु निश्चित दु। पार्टी अध्यक्ष प्रचण्ड थज्याःगु जोखिम कायेत गुलि तयार जुइगु खः, आः थथें धाये मफुनि। लिसें थःगु नेतृत्वय् सरकार दयेके बीगु खःसा मिले जुइ धइगु बिचाः वैद्य खेमां बिल धाःसा थुकिं वैद्य पुचलं नं केवलया पदया लागिं जक पार्टी दुने 'बखेडा' पिकयाच्वंगु खः धइगु सन्देश जनताय् वनी। पार्टीया विवादय् पदयात न्ह्यःने तये हल धाःसा थज्याःगु हे समस्या वइगु खः ।

More Stories Like this