बागू दर्जन आयोजनायात न्हूगु भाः

येँ(सन्ध्या टाइम्स)/सरकारं बागू दर्जन विद्युत आयोजनाया लगानीकर्तायात न्हूगु विद्युत खरिददर बीगु निर्णय याःगु दु। उर्जा मन्त्रालयय् जूगु छगू ताःहाकःगु सहलह लिपा मन्त्री पोष्ट बहादुर बोगटीं न्हूगु भाः क्वःछीगु निर्णयया लिसें दछि न्ह्यवं निसें विद्युत खरिददर मदयाः थातिं लानाच्वंगु २१० मेगावाट क्षमताया खुगू आयोजनायात थःपिनिगु परियोजना दयेकेत आः लँपु चाःगु दु।
खुगुलिं आयोजना निर्माणया निंतिं म्होतिं नं नीन्यागू अर्ब तका लागत तुइगु अध्ययनं क्यंगु दु। सरकारं बिउगु न्हूगु भाः लगानीकर्तातय्सं याःगु माग कथं जूगुलिं थुकी छुं नं विवाद मदुगु विद्युत विकास विभागं न्ह्यथंगु दु। सरकारं न्हूगु आयोजनाया निंतिं क्वःछिउगु भाः कथं आयोजनाया प्रवर्द्धकतय्त आः प्रतियुनिट५/० पैसा दइ। अथे हे बर्खाया इलय् च्याला तकया निंतिं ४/८० पैसा व चिकुलाया इलय् ८/४० पैसा प्रतियुनिट दइगु जूगु दु।
मन्त्रालयं थ्व स्वयां न्ह्यव न्हूगु भाः मबीगु अडान काःगु व आयोजना प्रवर्द्धकतय्सं नं सम्झौताया लिधंसाय् भाः काये दयेमाःगु अडान कायेवं निगू पक्षया दथुइ विवाद जुयाच्वंगु खः।
खुगुलिं आयोजनाया लगानीकर्तातय्सं अग्रिम भुक्तानी कथं सरकारयात ४५ करोड तका बी धुंकूगु दुसा जमानत नं दाखिला याये धुंकूगु दु।
यद्यपिं निगुलिं पक्षया दथुइ ब्वलंगु विवादं यानाः परियोजना निर्माणया ज्या दछि लिबाःगु खः।
खुगू मध्ये न्यागू स्वदेशी लगानीइ निर्माण जुइत्यंगु आयोजना खःसा तल्लो सोलु छगू धाःसा भारतया एस्सेल ग्रुप लिसें नेपाःया निगू वित्तिय संस्थाया मंकाः लगानीइ निर्माण जुइत्यंगु खः।