विदेशय् असुरक्षित नेपाःया नागरिक

थःगु देशय् माक्व ज्या मदुगु वा ज्या दःसां यक्व ध्यबा कमे यायेगु ताः तयाः विदेशय् ज्या याः वनीपिं नेपाःमितय् रोजगारी जक मखु ज्यान तकं गुलि असुरक्षित धइगु खँ अमेरिकाय् नकतिनि निम्ह नेपाःमितय्त गोलीं कयेकाः स्याना बिउगु घटनां क्यना बिउगु दु। अमेरिया निगू प्रान्तय् जूगु निगू अलग अलग घटनाय् निम्ह नेपाःमितय्त छुंतां म्वायेक गोलीं कयेकाः स्याना बिउगु खः। घटनायात कयाः अन च्वंपिं नेपाःमित आक्रोशित जूसां प्रहरीं धाःसा आः तक सुयातं ज्वंगु मदुनि। नेपाःमिया केश जूगु कारणं शायद सुयातं ज्वनी नं मखु जुइ। अमेरिका लगायत आपालं देशय् नेपाःमित गैरकानुनी रुपं च्वनाच्वंगु दु। गुकिं यानाः उमित सुनां लुटपाट यात वा हत्या हे याना थकल धाःसां नं उकिया कानुनी उपचार काये फइगु अवस्था मदु।
थुकिया नापनापं नेपाःया थीथी डान्स रेष्टुरेन्टय् ज्या याइपिं डान्सरत थौंकन्हय् विदेशय् वनाः नं डान्स याः वनी धइगु समाचार पिहां वःगु दु। पिने वनीपिं थ्व मिस्त नं गैरकानुनी जुइगु कारणं उमित ज्या याकेधुंकाः ध्यबा मबिउसां वा यौन शोषण थेंज्याःगु ज्याखँत जूसां छुं याये मफइगु अवस्था दु। विदेशया गुलिखे देशय् गैरकानुनी रुपं दुहां वल धकाः गुलिखे नेपाःमितय्त आः तकं कुनातःगु तकं अवस्था दु। आखिर नेपाःया ल्याय्म्ह पुस्ता छाय् थुकथं विदेशय् ज्या याः वने मालाच्वन अले छाय् पिने न्ह्याक्व हे अपमानित जूसां सहः यानाः च्वनाच्वने माल? कमजोर देशया नागरिकयात न्ह्याथासं अपमान हे जक दइगु जुयाच्वन। पिने ज्या याः वनीपिं नेपाःमितय्सं वने न्ह्यः हे थज्याःगु यथार्थय् नं मिखा तयेगु याःसा बांलाइगु खः।

More Stories Like this