ज्यापु महागुथि येँया तःमुँज्या

येँ(सन्ध्या टाइम्स)/ज्यापु महागुथि, येँ महानगर समितिया स्वक्वःगु तःमुँज्या ताःलाकेगु निंतिं म्हिगः छगू पत्रकार सम्मेलन जुल। ज्यापु महागुथि येँ महानगर समितिया ग्वसालय् जूगु उगु पत्रकार सम्मेलनय् प्रचार प्रसार संयोजक न्हुच्छे महर्जनं प्रेस वक्तव्य ब्वनाः न्यंकादीगु खः।
सम्मेलनय् न्ह्यब्वःगु उगु वक्तव्यय् ज्यापु जाति अलग्ग जाति मखुसे दक्व नेवाःत नापं छप्पँ जुयाः वनेगु, न्हापा धार्मिक व सांस्कृतिक रुपं जक न्ह्यानाच्वंगु थ्व जाति आः आर्थिक व राजनैतिक रुपं नं न्ह्यज्याइगु खँ उल्लेख यानातःगु दु। थुकिया लिसें थुगुसीया अधिवेशनया मू-आज्जु हे नेवाः स्वायत्त राज्य पलिस्था यायेगु खँ नं उल्लेख यानातःगु दु।
ज्याझ्वलय् ज्यापु महागुथिया नायः राजभाई ज्यापुं थुगु महाधिवेशनं नेवाः दक्वं छप्पँ जूगु दु धइगु सन्देश यालिसें स्वायत्त राज्य व संविधान निर्माणया प्रक्रिया नं न्ह्याइगु खँ कनादिल।
सम्मेलनय् पत्रकारतय्सं तःगु न्ह्यसःया लिसः समितिया उजंकथं पुचःया संयोजक राजभाइ जकःमिं बियादिल। थुकिया लिसें वय्कलं संघीयताया विरोधीतय्गु षड्यन्त्रया विषयय् सचेत यायेमाःगु ज्यापु जातियात बौद्धिक रुपं न्ह्यज्याकेगु लगायतया खँ न्ह्यथनादिसें विकासया नामय् लँ दयेकेगु नीतिं छेँ थुनेगु ज्याया विरोध नं यानादिल। सम्मेलन समितिया नायः ई. मोहनकृष्ण डंगोलया सभापतित्वय् जूगु खः। थुकिया लिसें थौं सुथय् च्याताः इलय् प्रचार प्रसारया निंतिं सांकृतिक र्‍याली नं जुल।