पृथ्वीनारायण बारे बाबुरामया धापू ?

येँ(सन्ध्या टाइम्स)/प्रम डा. बाबुराम भट्टराईनं जुजु पृथ्वी नारायण शाह प्रति थःगु उच्च सम्मान दुसां थःगु पार्टीया छुं जनजाति नेतातय्के धाःसा थुकिया बारे छुं भ्रम दु धकाः धयादीगु खँ आः वयाः सार्वजनिक जूगु दु। पृथ्वी दिवसया झ्वलय् म्हिगः बीबीसी नेपाली सेवालिसे खँ ल्हासें राप्रपा नेपालया अध्यक्ष कमल थापां थ्व खँया जानकारी बियादीगु खः। प्रधानमन्त्रीया चुनाव जूबलय् डा. भट्टराई नं थःथाय् भोट फ्वनेत वःगु व उगु इलय् थम्हं पृथ्वीनारायण शाहया योगदानयात क्वपाले मजिउ धयाबलय् भट्टराईनं थ्व खँ कँसें थ्व बारे थःगु पार्टीइ खँ तये धकाः आश्वासन बियादीगु खँ नं थापां कनादिल।
थापां हानं धयादिल, 'थ्वहे खँ नेपाली कांग्रेसया नेता रामचन्द्र पौडेलयात धयाबलय् वय्कलं चाहिं तुरुन्त हे स्वीकार यानादिल। उलि जक मखु यदि थः प्रधानमन्त्री जुल धाःसा सरकारीस्तरं हे पृथ्वी जयन्ती न्यायेके नं धयादिल।'