फुक्क धर्म दुथ्याःगु अन्तर धार्मिक संजाल

येँ(सन्ध्या टाइम्स)/विश्वया थीथी देशय् धार्मिक दंगा जुयाः धनजनया क्षति जुयाच्वंगु इलय् नेपालय् धाःसा थीथी धर्म माने याइपिं छथ्वः मनूत थःथः मुनाः अन्तर धार्मिक संजाल दयेकुसें धार्मिक सहिष्णुताया अनुपम दसु न्ह्यब्वःगु दु।
पूर्वी नेपाःया मोरङ जिल्लाय् च्वंपिं न्यागू धर्मया मनूत छथाय् च्वनाः थ्व संजाल दयेकूगु खः। थुकी हिन्दू, किराँत, मुस्मां, बौद्ध व क्रिश्चियन धर्म माने याइपिं मनूत दुथ्याः।
थुमिसं थीथी धर्मया मनूतय्सं न्यायेकीगु नखःचखः व पर्वय् फुकसितं सःताः सहभागी याकी। आः तक उमिसं हिन्दू धर्मया थीथी नखः लिसें किराँतीतय् उधौली, मुस्मांतय् ईद, क्रिश्चियनतय् क्रिसमस व बौद्धतय् ल्होसारय् फुक्कसितं सःताः न्ह्यइपुकेगु यानाच्वंगु दु।
नखःचखः मदइबलय् धाःसा वाः पतिं मुनाः सहलह ब्याकेगु ज्या याइगु जुयाच्वन। थ्व सहलह नं न्ह्याबलें छथाय् जक मच्वँसें गबलें देगः, गबलें चर्च, गबलें गुम्बासा गबलें मस्जिदय् मुनेगु यानाच्वंगु दु।
न्यादँ न्ह्यः अनया थीथी मस्जिदय् आक्रमण जुइवं स्थानीय मनूत जानाः धार्मिक सहिष्णुता ब्वलंकेत थ्व संजाल दयेकूगु जुयाच्वन। न्हापा छगू धर्मया मनू मेगु धर्मया धार्मिकस्थलय् दुहां तकं मवनीगु खःसा आः धाःसा फुक्कं धर्मयापिं फुक्कं धर्मया थासय् वनेगु सामान्य थें जुया वःगु दु। लिसें थुकिं उगु लागाय् बांलाःगु सन्देश नं वनाच्वंगु दुसा थुकियात विस्तार यायेगु लागिं आः संजालं गांगामय् नं फुक्क धर्मयापिं मनूत दुथ्याकाः शाखा चायेकेगु ताः तःगु दु।