वैद्य पुचःयात भट्टराई अस्वीकार्य

डा. भट्टराईया सरकारय् दुहां मवनेगु घोषणा
येँ(सन्ध्या टाइम्स)/प्रधानमन्त्री डा. बाबुराम भट्टराईया वर्तमान सरकारयात हे राष्ट्रिय सरकारया रुप बिया यंकेगु धकाः माओवादी अध्यक्ष प्रचण्डं तयारी यानादीसां थ्व सरकारय् माओवादीया हे असन्तुष्ट खेमाया नेतातय्सं च्वनेत अस्वीकार याःगु दु।
थुकिं यानाः स्वय्म माओवादी नेतातय्सं हे च्वनेत अस्वीकार याःगु सरकारय् झन कांग्रेस व एमाले ला छु च्वनी धइगु न्ह्यसः नं पिहां वःगु दु।
पार्टीया विवाद समाधान यायेत अध्यक्षं न्हूगु हे प्रस्ताव तयार यायेगु व मेखे सरकारया विवाद समाधान यायेत चाहिं डा. बाबुराम भट्टराईया सरकारय् वैद्य पक्ष नं समावेश जुइगु धकाः सहमति जूगु खः। तर वैद्य पक्षया नेता सीपी गजुरेलं धाःसा थःपिं भट्टराईया सरकारय् वनेगु जुइ मखु धयादीगु दु।
वय्कलं धयादीगु दु, 'थ्व सरकार राष्ट्रिय सरकार नं जुइ फइ मखु, थुकी जिपिं दुहां वनेगु नं खँ जुइ मखु। उकिं बाबुरामजीं राजीनामा यायेगु हे वेश जुइ।'
खँ गय् यानाः मिले याना वनेगु धइगु विषयय् थःपिंसं अध्यक्ष प्रचण्डलिसे सल्लाह यायेधुनागु व वहे आधारय् वय्कलं प्रधानमन्त्रीलिसे खँ ल्हाये धयादीगु दु धासें गजुरेलं धयादिल, 'आः प्रधानमन्त्रीलिसे वय्कलं छु खँ ल्हात, गय् यानाः खँ ल्हात जिं मसिउ। छुं जुयाः थ्वहे सरकार टिके यायेगु धइगु खँ वल धाःसा उकी जिमिगु अझ नं विरोध जुइ।'
छखे मोहन वैद्यं अध्यक्ष प्रचण्डलिसे खँ ल्हायेगु झ्वलय् यक्व खँ मिले जुल धायेगु, मेखे वैद्य पक्षया हे सीपी गजुरेलपिंसं अझ नं खँ मिले मजूनि धायेगु थ्व सन्दर्भ स्वयेबलय् वैद्य पक्षया दुने नं निगू धार पिहां वःगु खः लाकि धइगु आशंका राजनीतिक ख्यलं याना हःगु दु।
वैद्य पक्षया नेतृत्व यानादीम्ह स्वय्म मोहन वैद्य किरण यक्व खँय् मिले जुयाः वनेत तयार दुसां नेत्र विक्रम चन्द, सीपी गजुरेल थेंज्याःपिं 'हार्ड लाइनर' नेतात धाःसा तुरुन्त मिले जुयाः वनेगु पक्षय् मदुगु खँ सूत्रं धाःगु दु। वैद्य गुट दुने नं थ्व पुचः प्रधानमन्त्री भट्टराईनं राजीनामा हे बीमाः व वयां लिपा थःगु हे पक्षं सरकार दयेकाः न्ह्याः वनेमाः धइगु लाइनय् दु। वैद्य पक्षं पार्टीया महासचिव रामबहादुर थापा बादलयात प्रधानमन्त्री दयेकाः न्ह्याः वनेमाः धइगु प्रस्ताव अध्यक्षयात बियातये धुंकूगु दु।
सूत्रतय् दावी कथं थापायात प्रधानमन्त्री दयेकाः जूसां पार्टीया विवाद समाधान याना वनेत अध्यक्ष प्रचण्ड तयार दुसां प्रधानमन्त्री भट्टराई पद त्वःतेत तयार मदुगु व मेखे थापाया नेतृत्वयात मेमेगु दलतय्सं नं स्वीकार याइगु सम्भावना मदुगुलिं थुगु प्रस्तावयात खुल्ला रुपं स्वीकार यायेत अध्यक्ष प्रचण्डयात थाकुयाच्वंगु दु। वैद्य पक्षं सरकारय् वने मखु धाःगुलिं थौं च्वनेमाःगु वैठक नं अनिश्चित जूवंगु दु।