संविधानया माग यासें देश भ्रमण

ख्वाः स्वये अय्लाःगुलु ख्वाः वःगु कारणं देश भ्रमण यानादीम्ह भाजु यज्ञप्रसाद न्यौपानेयात छथाय् निथाय् लुटे नं याःगु जुयाच्वन।
धनकुटा/संविधान याकनं पित बीमाःगु माग यासें रसुवाया धैबुङ गाविस-६ लय् च्वंम्ह यज्ञप्रसाद न्यौपाने ७५ गू जिल्ला भ्रमणया झ्वलय् धनकुटा थ्यंकः झाःगु दु। वय्कः वंगु कार्तिक ५ गतेनिसें थःगु निलकष्ठ उच्च मावि रसुवाया नेपाली भाषा शिक्षण ज्यां दच्छिया लागिं बिदा कयाः देश भ्रमणय् पिहां झाःम्ह खः। वय्कः 'संविधान याकनं दयेमा, जनताया मनय् शान्ति न्यनेमा' धइगु पवित्र उद्देश्य तयाः धुन्चें येँपाखें भ्रमण सुरु यानादीम्ह खः।
भ्रमणया झ्वलय् थः स्वचा जंगलय्, स्वचा गोठय् व स्वचा सतकय् नं द्यःनेधुनागु खँ सन्ध्या टाइम्सयात कनादिल। वंगु पुस २२ गते १२:३० बजे वय्कः धनकुटाया घोलिखर्क गाविसय् थ्यंकः झाःगु खः। आः तक थम्हं झिंखुगू जिल्लाया पैदल भ्रमण पूवंके धुनागु खँ वय्कलं कनादिल। वय्कः रसुवां धादिङ जुयाः छसिकथं नुवाकोट, येँ, यल, ख्वप, काभ्रे, सिन्धुपाल्चोक, दोलखा, रामेछाप, ओखलढुंगा, सोलुखुम्बु, संखुवासभा, भोजपुर, खोटाङ जुयाः धनकुटा थ्यंकः झाःम्ह खः।
घोलिखर्क गाविसय् थ्यंकूम्ह वय्कःयात घोलिखर्क गाविसया सचिव श्यामबहादुर दैउजां सत्यादां आर्थिक ग्वाहालि यानादिल। थःगु भ्रमणया झ्वलय् वय्कः गन गन छु छु स्कुल व गाविसय् थ्यंकी उगु उगु स्कुलय् वा गाविस भवनय् दां फ्वनादी। थ्व झ्वलय् तयार यानादीगु फाइलय् थीथी प्रहरी चौकी, गाविस भवन व स्कुलया लेटर प्याडय् हे हापं बियागु वा अन वःगु प्रमाणित यानागु भ्वँत मुंकुमुंकुं च्वनादीगु दु। रामेछापंनिसें शुरु याःगु उगु अभियानय् घोखिखर्कया ग्रामिण सामाजिक माविपाखें निमित्त प्रधानाध्यापक दिलिपकुमार श्रेष्ठं १२१ तका ग्वाहालि यानादिल। नापं विद्यालयया शिक्षकतय्पाखें ११० तका दां नं मुन।
वय्कः देशब्यापी पैदल यात्री छम्ह गजलकार नं जुयाच्वन। वय्कःया 'हारेको छैन' गजल संग्रह पिहां वःगु दु। आः थुगु यात्राया अनुभव व यातनायात कःघानाः 'सन्तुष्टिको खोजी' नांगु यात्रा गीतिकाव्य नं च्वयादीगु दु। डिकुरेय् थ्यंकाः वय्कलं घोलिखर्क गाविसया पुलांम्ह अध्यक्ष गोपालराज थापापिनि न्ह्यःने वय्कलं उगु सफूया छुं कविता नं न्यंकादिल। म्येँ थुलि मार्मिक जुल कि थ्व म्येँ न्यनेधुंकाः प्रभावित जूम्ह पुलांम्ह गाविस अध्यक्ष गोपालराज थापां उघिमय् हे थः व थः पासा निलम बिकपाखें वय्कःयात सच्छिदां ग्वाहालि यानादिल। ख्वाः स्वये अय्लाःगुलु ख्वाः वःगु कारणं वय्कःयात छथाय् निथाय् लुटे नं याःगु जुयाच्वन। काभ्रेया कार्तिके धाःथाय् तामाङ मस्तय्सं निथु प्यथु दायाः वय्कःयाके च्वंगु स्वसः दां लुटे यात। अथेहे दोलखाया सफे धाःगु थासय् मोबाइलया चार्जर व प्यसःदां लुटे यात। नापं थः ओखलढुंगाया कुवापानी धाःगु थासय् वनाच्वनागु इलय् नं अनया सिद्धिकाली माविइ बाय् च्वंवंगु इलय् सनिलया ५ बजेपाखे ग्वाहालि याः वयापिं धकाः वःपिं ल्याय्म्हतय्सं वयात स्वथु थ्वानाः स्वसःदां लुटे यात।
झिंछगू व न्यागू तगिमय् ब्वनाच्वंपिं निम्ह कायपिंत छेँय् त्वःताः देशय् न्हूगु संविधान याकनं तयार यायेमाः धकाः नेतातय्त दवाव सिर्जना यायेगु ताः तयाः धनकुटा थ्यंकादीम्ह वय्कः आः थनं तेह्रथुम, इलाम, पाँचथर जुयाः पश्चिमपाखे वनेगु सोचय् दु। वय्कःयात आः तकं गांगामय् द्यनेत आमा समूहतय्सं ग्वाहालि यानाच्वंगु व विश्वास याकेत तसकं हे थाकुइगु नं कनादिल। वय्कःया सोच धाःसा गिनिज बुक अफ वर्ल्ड रकर्डय् नां च्वकेगु हे खः। थः ब्वनागु स्कुलय् छम्ह ज्याथम्ह मनू देशया फुक्कं जिल्ला भ्रमणय् वनेगु धकाः ज्याझ्वः तकं याःगु लुमंकाः हे थःके उगु सोच वःगु खँ कनादीम्ह वय्कःया साहित्यिक नां धाःसा यज्ञ 'अभीर' खः। मां फल कुमारी न्यौपाने व अबु अंगीरथ न्यौपानेया काय कथं २०३२ साल पुस १९ गते बूम्ह वय्कलं थुगुसी थःगु बुदिं नं धनकुटाय् हे न्यायेकादिल, व नं अय्लाः त्वनाः।
� कृष्ण प्रजापतिपाखें

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया