छेँखापतिकं नेवाः भाय् स्यनेगु अभियान न्ह्याके

शिला साय्मि
जीवन छगू संघर्ष खः। पंगःयात चीकाः न्ह्यायेगु हे सफलता खः धयादीम्ह मय्जु सुनिता डंगोल थुगुसीया 'मिस नेवाः' जुइत ताःलात। वंगु पुस १६ गते प्रज्ञाभवनय् जूगु 'मिस नेवाः २०११' ज्याफ्वलय् स्वीन्याम्ह मय्जुपिंत लिफ्यानाः वय्कः मिसा नेवाः जुयादीगु खः।
वकुन्हु 'मिस नेवाः' धकाः थःगु नां घोषणा जुइवं थःगु लसताया सीमा हे मदुगु अनुभव प्वंकादी मय्जु डंगोलं। फियां फी मफयेक वःगु न्हिला ख्वबिइ रुपान्तरण जूगु अनुभव कँसें वय्कलं धयादी, 'उगु लसताया इलय् जिमि बा नं जिलिसे हे दुगु जूसा थ्व लसताया रंग अझ गाढा जुइगु खइ।'
गज्याःगु संयोग 1 मिस नेवाः घोषणा जूगु न्हि वय्कःया अबु मदुगु झिंस्वन्हु तिनि दुगु जुयाच्वन।
थःगु जीवनया दकलय् लसताया ई पलख जक हने खंसा छम्ह साहसी नेवाः मिसा जुयाः वय्कलं उगु दुःखया ईयात नं सुखय् हीकादिल।
थः मिस नेवाः जुइखंगुया श्रेय ग्वसाः खलः नेपलिज फेशन होमया नायः मय्जु हेमा मानन्धरयात बिसें अबु मदयाः शोकय् दुनाच्वनाम्ह थःत प्रतिस्पर्धाय् वनेत वय्कलं हे बः बियादीगु खँ कनादी। अबु मदुगुलिं वय्कलं ला कासा त्वःतेगु हे निर्णय यानादीधुंकूगु खः। तर कोरियोग्राफर संजय महर्जनं छेँय् थ्यंक हे वयाः समाजया परिबन्धयात छखे चीकाः शोकयात शक्तिइ हीकेगु प्रेरणा यानादिल। धयादी, उकिया हे लिच्वः खः, थ्व ताज।'
इन्टरनेट, टेलिभिजन स्वयेगु बानी दुम्ह जुयाः मिस नेवाः, मिस नेपाल थेंज्याःगु ज्याझ्वः जुइबलय् थम्ह नं ब्वति काये दःसा जिउ धइगु बिचाः वय्कःयाके न्हापांनिसें ब्वलनीगु जुयाच्वन। मिस नेवाः जूबलय् नं पत्रिकाय् पिदंगु विज्ञापन स्वयाः पासापिंनाप सहलह ब्याकुसें न्हापांगु अडिसनय् ब्वति कायेधुंकाः तिनि वय्कलं छेँय् जानकारी बियादीगु जुयाच्वन। कासाय् ब्वति कायेत मांबौपिंसं उजं बी मखुला धइगु शंका वय्कःयात जुयाच्वंगु लानाच्वन। तर शंकाया अःखः मांबौपिंसं हःपाः हे बिसेंलि आत्मबल हे स्वकु थहांवंगु अनुभव नं वय्कलं न्यंकादिल। थुकिया लिसें दाजु संजिब डंगोलं नं थुकी तःधंगु ग्वाहालि यानादीगु जुयाच्वन।
नीन्यान्हुया प्रशिक्षणं थःत उपाधि लिसें जीवनया मू थुइकेत तःधंगु ग्वाहालि याःगु वय्कःयात ताः। धयादी, 'थ्व झ्वलय् सु मनूनाप गुकथं खँ ल्हायेमाः धइगु ज्ञान नं दत।' प्रशिक्षणं थःगु मांभाय् व संस्कृतिया महत्व, संस्कृति हनाच्वनागु कारण व संरक्षण यायेमाः धइगु चेतना समेत थना बिउगु वय्कःया अनुभव दु। थुलि जक मखु थःगु प्रतिभा न्ह्यब्वयेगु व थःत थम्हं म्हसीकेगु ह्वःताः नं थुगु प्रशिक्षणं हे थःत बिउगु वय्कःया बिचाः दु।
सान इन्टरनेशनल कलेजय् बी.एस्सी. ब्वनाच्वनादीम्ह वय्कःया छम्ह सेल्लाःम्ह बायो टेक्नोलोजिष्ट जुइगु लक्ष्य दु। मचांनिसें आखः ब्वनेगुली न्ह्याबलें न्ह्यःने लाःम्ह वय्कः थम्हं सः सिउगु खँ मेपिंत स्यनेगुली नं न्ह्यः लाः। प्याखं हुलेगु, बाँसुरी पुइगु व स्वीमिङ्गया शौखिन सुनितां थ्व सम्बन्धी प्रशिक्षण धाःसा गनं कयादीगु मदु। स्कूलय् जुइगु थीथी कथंया कासा व कलेजय् जुइगु थीथी विषयया कासाय् नं सिरपाः त्याकादीगु दु।
मय्जु डंगोलया जीवनया मू�आज्जु डाक्टर जुइगु खःसां नं थःगु मांभाय्, संस्कृति संरक्षण यायेगुपाखे नं निरन्तर पलाः न्ह्याकेगु बिचाः दु। मांबौपिंसं थौंकन्हय् थः मस्तय्त थःगु मां भाय् मस्यंगुलिं हे मस्त नेवाः भासं खँल्हाये मसःगु टिप्पणी यानादीम्ह वय्कलं आः छेँखापतिं नेवाः भाय् स्यनेगु अभियान न्ह्याकेगु थःगु मनसुवा दुगु खँ नं कनादी।

More Stories Like this