पुस २७ या एकता व आः जुइमाःगु एकता

थौं पुस २७ गतेयात 'राष्ट्रिय एकता दिवस' धकाः न्यायेकेगु चलन न्हापा दुगु खः। पृथ्वीनारायण शाहं युद्धपाखें 'नेपाः एकीकरण' याःगु 'योगदान' यात लुमंकाः तत्कालिन पञ्चायती व्यवस्थां वय्कःया बुन्हियात हे राष्ट्रिय एकता दिवसया रुपय् हनेगु सुरु याःगु खः। तर देशय् राज्य पुनर्संरचनाया आन्दोलन न्ह्यायेधुंकाः पृथ्वीनारायण शाहं याःगु थ्व ज्यायात नेपाः एकीकरण धायेगु लाकि मधायेगु धइगु न्हूगु वहस सुरु जूगुया नापनापं राज्यं पुस २७ यात बियातःगु 'राष्ट्रिय एकता दिवस'या मान्यतायात नं खारेज याना बिल। वयां लिपा पृथ्वीनारायण शाहया योगदान राज्य पुनर्संरचनाया सन्दर्भय् विवादया मेगु अध्याय जुयाः न्ह्यःने वया बिल। थौं देशय् पृथ्वीनारायण शाहया योगदानयात एकीकरण धायेगु लाकि मेगु देशय् याःगु हमला धायेगु धइगु निगू वैचारिक खेमा स्पष्ट रुपं अस्तित्वय् वःगु दु।
थौंया सन्दर्भय् पुस २७ यात राष्ट्रिय एकता दिवस धायेगु मयाःसां नेपाःयात एकता दिवस हे आवश्यक मदुगु धाःसा मखु। वास्तवय् दँय्दसं एकता दिवस न्यायेकेगु याःसां देशय् एकता धाःसा मदुगु जुयाः हे राज्य पुनर्संरचनाया माग न्ह्यःने वःगु खः। पृथ्वीनारायण शाहया एकता भूगोलया जक एकता खः। अथवा धाये व सामर्थ्यया एकता खः। आः जुइत्यंगु एकता पहिचानया एकता खः। पृथ्वीनारायणं याःगु भूगोलया एकता छाय् असफल जुल धायेबलय् अन पहिचानया स्पष्ट कमी खनेदु। वास्तवय् भूगोल एक जुइवं मुलुक एक जुइ मखु धइगु शिक्षा झीसं थ्व निसःत्या दँया अनुभवं सयेका कायेमाःगु खः। उकिं नं पुस २७ झीगु लागिं असफल व असान्दर्भिक एकता जूवंगु खः।

More Stories Like this