भिंगु राजनीतिया ज्या सुमनू दयेकेगु

लोकबहादुर शाक्य
बन्द याःबलय् सर्वसाधारण जनतायात अतिकं दुःख जुल। सर्वश्रेष्ठ प्राणी धायेकाच्वंपिं मनूतय्के दयेमाःगु विवेक बुद्धि क्षीण जुयाः हे बन्दया ज्या जुल। विवेक बुद्धि सदुपयोग मयात कि मनूत नं पशु सरह जुइगु जुल।

लोकतन्त्रया निगू च्व:
क्रान्ति धायेबलय् थौंकन्हय्या सन्दर्भय् जुलुस, हडताल, बन्द, धर्ना तथा हतियार ज्वनाः विद्रोह यायेगु धइथें थुइकल, सम्यक शिक्षा कथं क्रान्ति धायेबलय् सार्वजनिक रुपं यथार्थ प्रति जनचेतना थनाः मिथ्या, रुढी सिद्धान्तपाखें रक्षा यायेगु खः, क्रान्तिया परिभाषा थुइकेत विद्रोह तथा आतंकवादया अर्थ नं वोध यायेमाली। सामान्यतः हरेक नागरिकयाके थःगु बिचाःयात स्वतन्त्र रुपं अभिव्यक्ति यायेगु व मेपिनिगु बिचाःयात स्वतन्त्र रुपं माने यायेगु अधिकार दु। थ्वयात नागरिक बा मानव अधिकार धया तल। गुबले छम्ह नागरिकं स्वतन्त्र रुपं चिन्तन मनन यायेगु अथवा अभिव्यक्ति यायेगु अधिकार कयाच्वनी, अन प्रजातान्त्रिक चिन्तन दुगु जुल। थुकथं सुं नं मनूया बिचाःयात मेम्हेसिनं गन स्वतन्त्र रुपं मञ्जुर याये फइ अन न्यायिक पद्धति दु धाये फइगु जुल।

आतंकवादीया लक्षण
थुपिं निगू विशेषता मध्ये स्वतन्त्र मानवीय चिन्तन यायेगु अधिकार मन्त कि अथवा स्वयागु अभिव्यक्तियात स्वतन्त्ररुपं माने याये मंत कि विद्रोह जुइगु जुल। हानं विद्रोहीं मेपिनिगु वा थःगु बिचाः चिन्तन याके बी मखु। अझ मेपिनिगु बिचाःयात स्वतन्त्ररुपं माने याके बी मखु, थ्व निगू विशेषता हननयात आतंकवाद धयातल। आतंकवादी नं विपक्षीयात प्रजातान्त्रिक चिन्तन नं याके बीमखु, स्वतन्त्र रुपं मेपिनिगु बिचाःयात माने याके नं बी मखु। आतंकवादीया गुगु बिचाः दु वकथं हे जबर्जस्ती चिन्तन याये माःगु अले माने यायेमाःगु जुयाच्वन। गन प्रजातान्त्रिक चिन्तन यायेगु अधिकार दइ तथा मेपिनिगु बिचाःयात स्वतन्त्र रुपं माने यायेगु न्यायिक पद्धति नं दइ उकियात क्रान्ति धयातल। क्रान्तिकारीं मानवीय बिचाःयात स्वतन्त्र रुपं अभिव्यक्त यायेगु लकस तयार याना बी। थ्वयात फलस्वरुप न्हून्हूगु बिचारधाराया प्रतिस्पर्धात्मक चिन्तन सार्वजनिक जुइगु नापं हरेक नागरिकं नं न्हूगु चिन्तनयात स्वतन्त्र रुपं माने याये फइगुलिं न्हून्हूगु सृजना जुयाच्वनी। थुगु कथं मानव समाजया समृद्धि जुयावनीगु जुल।

जिम्मेवारी वहन: देशभक्तया चिं
सम्यक शिक्षाय् प्रजातान्त्रिक चिन्तन याये दइगु नापं मेपिनिगु बिचाःयात स्वतन्त्र रुपं माने यायेगु अधिकार दु। थ्व सम्यक शिक्षायात क्रान्तिकारी शिक्षा धयातल। सम्यक सम्बुद्धं प्रजातान्त्रिक चिन्तन नापं मनोभावना हीकाः माने यायेगु न्यायिक पद्धतिया माध्यमं शिक्षा प्रचार यानादीगु खः। बुद्धं आध्यात्मिक चिन्तन याये मन दुपिंत अथवा तीक्ष्ण बुद्धि दुपिंत जन्म मरण (भवचक्र) या दुःख मुक्त यायेगु निर्वाणया शिक्षा बियादीगु खः, तीक्ष्ण बुद्धि मदुपिं वा आध्यात्मिक चिन्तन याये मफुपिं वा मुक्तिया इच्छा मदुपिंत समाजय् च्वंतले सामाजिक सह अस्तित्वया भावना चायेकाः भ्रातृत्व पे्रमय् लगे जुयाः समाजप्रति यायेमाःगु जिम्मेदारीया शिक्षा बियादीगु खः। बुद्धं आध्यात्मिक क्रान्ति जक मखु सामाजिक क्रान्ति नं यानादीगु जुल। मनूतय् थःगु निजी परिवार, सामाजिक परिवार तथा राष्ट्रिय परिवार दयाच्वनी, व परिवारय् थः बा मेपिंसं छुं गल्ती यात कि दक्व परिवारं दुःख सी मालीगु जुयाच्वन। उकिं परिवारय् च्वनेबलय् परिवारया दुजलं पारिवारिक जिम्मेवारी पालना यायेमाःगु जुल। थौंया राष्ट्रिय समस्याया विषय राष्ट्रिय परिवार वा राष्ट्र बचे यायेत, समृद्ध दयेकेत च्वय् च्वंगु सिद्धान्त नाला मकासें मगानाच्वन। थ्वयात देशभक्त वा कुशल नागरिकया कर्तव्य नं धायेबह जू।
लोकमतया अःखः ज्या:
च्वय् न्ह्यथना कथं मानवीय बिचाःयात स्वतन्त्ररुपं अभिव्यक्त यायेगु अधिकार दयेमाःगु जुल, बुद्धं आध्यात्मिक ज्ञानया नापं सामाजिक क्रान्ति नं यानाबिज्याःगु खँ स्पष्ट दु। अले विद्रोह, आतंकवाद व क्रान्तिया विषयय् नं उल्लेख जुयाच्वंगु थुइकेबह जू। हानं दुनुगलं बिचाः यायेमाःगु खँ सिद्धान्तय् जक अलमले मजुसे लोककल्याण कार्यय् दृष्टि तयाः व्यवहारिक रुपं हे कुशल मंगल सेवाया ज्याखँ यानाः मैत्री करुणा समान भावना नं ब्वलंके माःगु सत्य तथ्य खँ ल्वःमंके मजिल। झीगु देशय् इलय् ब्यलय् क्रान्तिया नामय् लोकजनयात मर्का जूगु घटनात नं यक्व जू।
कार्यकर्ता लके याये मफुपिं नेता:
छगू घटनाय् दोषी जुयाः झ्यालखानाय् कुनातःगु धायेमाल। गबलें जेलय् कुनातःपिं थःथः ल्वापु जुइगु नं मामुली जुइधुंकल। ल्वापुया झ्वलय् छम्ह ल्याय्म्ह नेता नं घाःपाः जुयाः अस्पतालय् वासः याके यंकातःगु खःसां लिपा सित। पार्टी कचाया जिल्ला नेता जूगुलिं उत्पात मचे यात। सरकारं छानबिन कमिटी गठन यात। दुःखं च्वंपिं परिवारयात क्षतिपूर्ति बीगु क्वःछित। पार्टीया क्वय्या तगिमय् च्वंपिं कार्यकर्तातय्सं अनेक माग यासें देस बन्द यायेगु क्वःछित।
जनतायात दुःख जुइ, देय् बन्द याये मजिउ धाःपिं केन्द्रीय नेतात दःसां इमिसं काबुइ काये मफुत। सरकारं इमिगु माग कथं ज्या याये धुनागुलिं बन्द याये म्वाःल धकाः इनाप याःगु नं खः। नापं विदेशी राजदूतपाखें नं बन्द मयायेत हार्दिक इनाप याःगु जुयाच्वन। सुयागुं हे खँ मन्यँसे आखिर बन्द यानां त्वःतल। थाय्थासय् ल्वापु जुल। गुलिखे वाहन, कार्यालय तोडफोड जुल। बन्द याःबलय् सर्वसाधारण जनतायात अतिकं दुःख जुल। सर्वश्रेष्ठ प्राणी धायेकाच्वंपिं मनूतय्के दयेमाःगु विवेक बुद्धि क्षीण जुयाः हे बन्दया ज्या जुल। विवेक बुद्धि सदुपयोग मयात कि मनूत नं पशु सरह जुइगु जुल। थौं देय्या नाजुक अवस्थाया कारण वाला स्वयेबलय् प्रशासन संचालन याइपिं तथा यानाच्वंपिं पार्टीत मिले मजूगु जक मखु छगू पार्टी दुने नं (तःधंगु पार्टी दुने) थवंथवय् मनमुटावं हे मू थाय् कयाच्वंगु दु। थज्याःपिंसं नं सुथांलाक्क विवेक बुद्धि मछ्यःगु नापं राष्ट्रिय भावना मदयाः मनू जूसां पशु सरह धाये माःगु अवस्था नं जुल। उकिं जिम्मेवार क्षेत्रया सम्बन्धित महानुभावपिंसं मनू वा पशु जुइगु सत्य तथ्य सिद्धान्त वाःचायेकाः लोककल्याणकारी ज्याखँ यानाः सच्चा मनू मजुइगु ज्यां होश तयाः लिचिले फयेके माल।
(सन्दर्भ सफू: भदन्त सम्यक सम्बोधि प्राण पुत्र कृत 'सम्यक शिक्षा')

More Stories Like this