राजदूत प्रसाद सुथ न्हापां हे प्रचण्डया छेँय् थ्यन

येँ(सन्ध्या टाइम्स)/संविधान निर्माण व शान्ति प्रक्रियायात कयाः दलतय् दथुइ ध्रुवीकरण अप्वया वनाच्वंगु इलय् लाक्क भारतया राजदूत जयन्त प्रसादं थौं सुथय् एकीकृत माओवादीया अध्यक्ष प्रचण्डयात नापलानादीगु दु।
राजदूत प्रसाद थौं सुथय् नयाँबजारय् च्वंगु प्रचण्ड छेँय् वनाः नापलानादीगु खः। उगु भेटवार्ताय् भारतीय राजदूत प्रसादं राजनीतिक दलतय् दथुइ अप्वया वनाच्वंगु दुरीप्रति थःपिनि चिन्ता प्वंकादीगु खः।
माओवादी व मेमेगु दल दथुइ थुकथं दुरी अप्वया वन धाःसा संविधान निर्माण व शान्ति प्रक्रियाय् नं लिच्वः लायेफुगु खँयात कयाः राजदूत प्रसादं चिउताः क्यनादीगु खः। लिसलय् प्रचण्डं थौंकन्हय् न्ह्यानाच्वंगु पार्टीया केन्द्रीय कमिटीया बैठक क्वचाये धुनेवं हे शान्ति व संविधान निर्माणया प्रक्रियाय् थःपिं गम्भीर जुयाः न्ह्याः वनेगु बचं बियादीगु खँ सूत्रं धाःगु दु।
राजदूत प्रसादं माओवादीं यायेगु धाःगु जनपरिचालनया विषययात कयाः नं जिज्ञासा प्वंकादीगु खः। प्रचण्ड व प्रसादया दथुइ जूगु भेटवार्ताया झ्वलय् राजनीतिक चर्चा नापनापं नेपाः व भारता दथुया स्वापूयात कयाः नं सहलह जूगु खँ धाःगु दु। नेपाः वयाः छुं ई सुम्क च्वनादीम्ह राजदूत प्रसादं गतिरोध पिहां वइगु खने दयेवं थःगु सक्रियता क्यना हःगु खः।