नेपालय् कडा जुइवं नेपाःया मिस्त विदेशी डान्स बारय्

येँ(सन्ध्या टाइम्स)/राजधानीया थीथी लागाय् चायेकातःगु डान्स रेष्टुरेन्टतय्त प्रहरीं कडाई याना हयेवं उकिं प्रभावित जूपिं मिसापिं डान्सरत थौंकन्हय् नेपालं पिने थीथी देशय् डान्स याः वनेगु ज्या अप्वया वःगु दु। नेपाःया मिसापिं डान्सरत थौंकन्हय् नेपालं पिने मलेशिया, खाडीया छुं देय् व चीनया स्वशासित क्षेत्र खासाया डान्स बारय् तकं डान्स यायेत थ्यनाच्वंगु खँ सीदुगु दु।
थ्व डान्सरत पिहां वनीबलय् धाःसा छुं कथंया अनुमति कयाः वनेगु सिबें नं चाःहिलेगु धकाः टुरिष्ट भिसा कयाः वनीगु खः। पिने थ्यनेवं अनया डान्स रेष्टुरेन्टय् स्वला प्यला ज्या यानाः छुं भचा ध्यबा कमे यानाः लिहां वइगु खः।
नेपाःया डान्सरतय्त विदेश यंकीपिं मनूतय्गु गिरोह हे थन सञ्चालन जुयाच्वंगु खँ नं सीदुगु दु। विश्वया थीथी देशय् च्वंगु डान्स बार, क्लब आदिलिसे थुगु 'कन्टाक्ट' जुयाच्वंगु दइ। उमिसं मनू छ्वया हजि धाल कि थनया डान्सरत उखे यंकीगु खः। थुमिसं अथे यंकीबलय् डान्सरतय्सं छुं कथंया श्रम स्वीकृति नं कयातःगु दइ मखु। थ्व गिरोहं नेपाःया मिस्तय्त खासा, मलेशिया, यूएई व मस्को तक नं यकेगु याः।
डान्सर मिस्त विदेशय् अवैध जुइ। उकिं उमित अन तःधंगु समस्या समेत दुगु खँ अनं लिहां वःपिं डान्सरतय्सं धाःगु दु। पिने वन धाःसा ज्वना यंकी धकाः उमित न्हिनय् नं अक्सर पित छ्वइ मखु। पासपोर्ट कयाः क्वथाय् हे 'कुनातःगु' दइ। लिसें थनं बी धाःगु ध्यबा नं बी मखु। उकी माथि यंकूपिं व ज्या बीपिं मिजंतय्सं हे यौन शोषण समेत याइगु खँ नं पीडित मिस्तय्सं धाःगु दु। तिब्बतय् ला नेपाःमि डान्सरतय्त न्हिछि बन्दी दयेकाः बहनी जक डान्स बारय् यंकाः प्याखं ल्हुके बीगु खँ नं उमिसं धाःगु दु।
देशय् जनयुद्ध सुरु जुइवं गामय् च्वने मफुपिं मिस्त येँय् वयाः डान्स रेष्टुरेन्टय् ज्या याइगु अप्वया वःगु खःसा लिपांगु इलय् प्रहरीं नं छापा मारे यानाः ज्वनेगु सुरु यायेवं विदेशपाखे वनाः प्याखं हुलेगु अप्वया वःगु खः।