अमेरिकाय् नेपाःमि स्याना बिल

छवाःया दुने निम्हेसित गोली
येँ(सन्ध्या टाइम्स)/अमेरिकाय् थ्वहे छवाःया दुने निम्ह नेपाःमियात गोलीं कयेकाः स्याना बिउगु दु।
एटलान्टाय् च्वंगु डेकाटुरया पेट्रोल पम्प (ग्याँस स्टेशन) य् ज्या याइम्ह नेपाःमि दामोदर पाठकयात वंगु सोमवाः चान्हय् गोलीं कयेकाः स्याना बिउगु दु। ड्यूटीइ दुम्ह पाठकयात चान्हय् छम्ह मनुखं न्ह्यःने थ्यंक हे वयाः प्वाथय् व नुगःपाय् गोलीं कयेकूगु खः।
गोली लायेवं पाठकयात ग्रेडी मेमोरियल अस्पतालय् भर्ना याःगु खःसां अन वय्कःयात बचे याये मफत। वंगु सोमवाः चान्हय् जूगु उगु घटनाया दृश्य अन तयातःगु सीसीटिभी रेकर्ड जुयाच्वंगु दु। उकी स्वयेबलय् गोलीं कयेकूम्ह मनू हाकु जातियाम्ह खः धइगु सीदु। गाहाकि जुयाः वःम्ह उम्ह मनूलिसे छझाः भनाभन जुइवं वं गोलीं कयेकूगु खः। घटना जुइ न्ह्यः पाठक निक्वः स्वक्वः काउन्टरं दुहां पिहां जूगु खः। यदि काउन्टर दुने हे च्वनाच्वंगु खःसा गोलीं हे कयेकूसां बुलेटप्रुफ खाःया कारणं बचे जुइ फइगु खः।
गोलीं कयेकूगु इलय् स्टेशनय् मेम्ह कर्मचारी जोसेफ नं ज्या यानाच्वंगु खः। जोसेफं हे घटना बारे प्रहरीयात खबर याःगु खःसा पाठकयात पुलिसं हे अस्पताल ब्वाकूगु खः।
सीम्ह पाठक यलय् च्वनीम्ह खः। १३ दँया म्ह्याय् व ११ दँया काय् दुम्ह पाठक सन् २००७ पाखे अमेरिका वंगु खः। निदँ न्ह्यवंनिसें वय्कलं थुगु पम्पय् ज्या याःगु खः। पम्पया थुवाः नं नेपाःमि भाजु कृष्ण दवकोटा खः। नेप्लिज एसोसिएसन अफ जर्जियाया बरिष्ठ उपाध्यक्ष नं जुयाच्वंम्ह देवकोटां पाठकया सीम्ह नेपालय् छ्वया हयेगु कुतः यानाच्वंगु दु।
मेखे अमेरिकाया साउथ क्यारोलोना स्पार्टवर्ग काउन्टीया सिट्या ग्याँस स्टेशनय् वंगु बुधवाः चान्हय् जूगु मेगु छगू घटनाय् नं छम्ह नेपाःमि स्याना बिउगु दु। अमेरिकाया नेपाःमितय्सं चले यानाच्वंगु 'नेपाली पोष्ट' अनलाइनय् न्ह्यथनातः कथं वकुन्हु चान्हय् साढे १० बजे जूगु छगू आक्रमणय् लानाः उगु पम्पया नेपाःमि संचालक नेपाःमि रवीन्द्र शर्मा सीगु खः। शर्मा ४० दँ दुम्ह खः। घटनाय् लानाः उगु हे ग्याँस स्टेशनय् ज्या याइम्ह ३५ दँया मेक्सिकन गुमारो गोन्जालेस नं सीगु खँ उकी धयातःगु दु। गुल्मीइ छेँ दुम्ह कृष्ण कँडेल व गोलीं कयाः सीम्ह पर्वतया रवीन्द्र शर्माया मंकाः लगानी वंगु जुलाईनिसें तिनि पेट्रोल पम्प सुरु याःगु खः। सन् १९९८ पाखे अमेरिका वंम्ह रवीन्द्र ताः ईतक डीसीया भर्जिनियाय् च्वनाच्वंम्ह खः। पर्वतया शंकरपोखरी गाविस कुँडापानीइ बूम्ह शर्माया स्वम्ह दाजु किजा दु। थौंकन्हय् वय्कःया परिवार नवलपरासीइ दुसा शर्माया प्यदँ दुम्ह म्ह्याय् व कलाः नं याकनं हे अमेरिका वनेगु तयारी यानाच्वंगु खः।
प्रहरीं निगुलिं घटनाय् अपराधीयात ज्वने मफुनि।