सुथय् म्येय् आतंक
येँ (सन्ध्या टाइम्स)/स्यायेत ठिक्क याना तःम्ह म्येय् छम्ह बिसिउँ वयाः थौं सुथय् थनया जनबाहाः-भ्याःचाद्यः लागाय् छझाः आतंक मच्चे याना बिल। सुथय् ९ बजे पाखे इनाय्खा त्वालय् बकरे आलम धाःम्ह मुस्मांनं स्यायेत ठिक्क याःम्ह उम्ह म्येय् अनं फुत्के जुयाः बिसिउँ वःगु खः ।
छ्यनय् छक्वः पां पाला तयेधुंकूम्ह उम्ह म्येय्यात ज्वनेगु लागिं लिना हहं भ्याःचाद्यः लागाय् थ्यंबलय् आतंक मच्चे याना बिल। उम्ह म्येय्नं थःगु न्ह्यःने वक्व मनूतय्त च्वयेगु सुरु यासेंलि अन मनूत भागाभाग हे जुइमाःगु अवस्था पिहां वल ।
बिसिउँ वयेगु झ्वलय् उम्ह म्येय्नं लँय् वयाच्वंपिं प्यम्ह मनूतय्त च्वयाः घाःपाः नं याना बिल। म्येय्या आतंकं यानाः उगु लागां वयेमाःगु सवारी साधन फुक्क लित हयेमाःगुलिं अन छझाः ट्राफिक जाम समेत जू वन।
लिपा उखेंथुखें ब्वाँय् जुयाच्वंम्ह उम्ह म्येय्यात खिउँलँया छखा तखागु छेँया च्वं खिपः क्वत हयाः गःपतय् लाक्क स्वतिपाँय् थें तयाः वयां लिपा तुरुन्त लिपा वयागु प्यपां तुति चिनाः छ्यनय् मुगलं दायाः स्याना बिल ।
