छेँ थुनेज्यायात नेवाः संघया विरोध

येँ (सन्ध्या टाइम्स)/नेपाल लोकतान्त्रिक नेवाः संघया केन्द्रीय कमिटीया पूर्ण बैठक नकतिनि चितवनय् क्वचाल। निक्वःगु राष्ट्रिय सम्मेलन धुंकाः जूगु थुगु मुँज्या संघया कार्ययोजना व ज्या भाला बीगु ज्या जूगु खः। संगठन विस्तार व सुदृढीकरण यायेगु निंतिं खुलाया योजना सहित थीथी प्रस्ताव पारित यासें संघं थौंकन्हय् स्वनिगःया थीथी थासय् लँ तब्या यायेगु नामय् स्थानीय आदिवासी नेवाःतय् छेँ व जग्गा बिना मुआब्जा बलजफ्ती त्यला कायेगु सरकारी ज्याया विरोध याःगु दु। उकथं हे नेवाः प्रदेश बिनाया पहिचान मदुगु प्रदेशत दयेकेगु लागिं थीथी पार्टी दुने षडयन्त्र न्ह्याःगु खँय् नं सतर्क जुसें नेवाःतसें नेवाः प्रदेशया नितिं अझ छप्पँ जुयाः संघर्ष यायेगु यायेमाःगु निर्णय नं संघं याःगु दु ।

थ्वहे झ्वलय् संघया चितवन जिल्लाया ग्वसालय् प्रशिक्षण ज्याझ्वः नं जुल। संघीयता, नेवाः राज्य व पिने च्वंपिं नेवाःतय् दायित्व लिसें आदिवासी जनजाति अधिकार व आइएलओ १६९ बारे प्रशिक्षण जगु खः। ज्याझ्वलय् एमाले नेता राजेन्द्र श्रेष्ठ, आदिवासी जनजाति महासंघया त्रिरत्न शाक्य, संघया पुलांम्ह नायः सानुराजा शाक्य, नायः कृष्ण बहादुर घःजु, न्वकु न्हुच्छेलाल महर्जनपिंसं प्रशिक्षण बियादीगु खःसा संघया केन्द्रीय दुजःपिं उद्योग कुमार पिया, सुमन श्रेष्ठ, चितवनया एमाले नेता शैलेन्द्र पिया, संघया चितवन जिल्ला नायः राजेन्द्र कुमार पिया, किरण कुमार अमात्यपिसं नं न्ववानादीगु खः ।