बहुमत हयेत राजनीति ध्रुवीकरण
येँ (सन्ध्या टाइम्स)/शान्ति व संविधानया निंतिं दलतय्गु दथुइ सहमतिया माध्यमं वनेगु धकाः छगू कथं समझदारी दयेकाः न्ह्याः वनाच्वंपिं नेतात लिपांगु इलय् वयाः थःथःपिनि पक्षय् बहुमत खाकेगु नितिं ध्रुवीकरण जुया वंगु दु ।
संविधान निर्माणया विषययात कयाः विवादित बुँदात ज्यंकेगु निंतिं दयेकूगु उपसमितिइ नापं उपसमितिं दयेकूगु कार्यदलय् सहमति जुइधुंकूगु विषय नं विवाद जुया वःगुलिं दलया नेतातय्सं आः संविधानसभाय् बहुमतया आधारय् हे मस्यौदा दयेके मालीगु जुल धइगु तायेकाः थुकथं राजनीतिक ध्रुवीकरण सुरु यानाहःगु खः।
न्हूगु संविधानया विवादित विषयत संविधानसभां मस्यौदा तयार यायेगु नितिं बहुमतं पारित याइगु जुयाः थःथःगु खँ संविधानया मस्यौदाय् दुथ्याकेगु तयारी कथं दलया नेतातय्सं ध्रुवीकरण सुरु यानाहःगु खः। छखे संविधानसभाया म्याद म्हो जुयाः वनाच्वंगु नापं संविधानया मस्यौदा नं दयेकेमाःगु ई नं झन झन म्हो जुया वंगुलिं एकीकृत माओवादीया लाइन कथं संविधानया मस्यौदाय् बहुमतया आधारय् दुथ्याकीगु सम्भावना अप्वया वःगुलिं विशेष यानाः नेपाली कांग्रेस व एमालेया नेतातय्सं मेमेगु चिचीधंगु दलयात नं थःपिनि पक्षय् सालेत अथे ध्रुवीकरणया ज्या सुरु यानाहःगु खः। कांग्रेस व एमालेया नेतातय्सं लगातार रुपं चिचीधंगु दलया नेतातलिसे सहलह ब्याकेगु नापं माओवादीया कारणं हे संविधान व शान्ति प्रक्रियायात पंगः ब्वलंगु धकाः थुइकेगु नापं फत धाःसा माओवादीया नेतृत्वय् दुगु वर्तमान सरकारयात तकं अविश्वासया प्रस्ताव यंकाः क्वःथलेगु तकं तयारी याःगु सीदुगु दु। अथे कांग्रेस व एमालेया नेतातय्सं राजनीतिक ध्रुवीकरण सुरु यायेवं एकीकृत माओवादीपाखें नं थःपिनिगु पक्षय् बहुमत हयेत नापं संविधानय् थःपिनिगु एजेण्डा दुथ्याकेगु निंतिं मेमेगु दलया नेतातलिसे सहलह ब्याकी धाःगु दु। उकिया नितिं माओवादीं जनसंविधान व शान्तिया मूल नारा ज्वनाः न्ह्याः वनीगु जूगु दु ।
माओवादीया न्ह्यानाच्वंगु केन्द्रीय कमिटीपाखें तकं जनसंविधान व शान्तिया नारा ज्वनाः जनपरिचालन यायेगु अले देशभक्त, गणतन्त्रवादीतय्त छथाय् हे हयेगु कुतः याइ धकाः माओवादीया छम्ह नेतां धयादीगु दु। पार्टी दुने जुयाच्वंगु लाइन संघर्षयात आःया नितिं फोरम दयेकाः बहसय् वनेगु अले शान्ति व जनसंविधानया निंतिं धकाः जनपरिचालन यानाः संघर्षय् कुहां वनेफत धाःसा जक पार्टीया नेता व कार्यकर्तात एकताबद्ध जुइ फइगु तायेकाः माओवादीं उगु कथंया रणनीति ज्वनेत्यंगु खः धकाः धाःगु दु ।
