माओवादीया अल्पकालीन एकता

ताः ई न्ह्यवंनिसें विवाद व तनावय् लानाच्वंगु नेकपा (माओवादी) या नेतातय्सं आः तत्कालया निंतिं पार्टीयात विभाजनपाखें बचे यायेगु उपाय लुइकूगु दु। पार्टीइ अध्यक्ष प्रचण्ड व उपाध्यक्ष मोहन वैद्य दथुइ ब्वलंगु सैद्धान्तिक मतभेदं यानाः पार्टी हे विभाजन जुइगु खः लाकि धइगु तकया अवस्था पिहां वःगु दु। उकी मध्ये नं असन्तुष्ट नेता वैद्य पक्षया छुं दुजःतय्सं ला आः पार्टी तज्याःगु घोषणा जक याये ल्यं दनि धकाः सार्वजनिक रुपं हे न्ववायेगु सुरु याना हःगुलिं आः माओवादीयात विभाजन जुइगुपाखें सुनां नं बचे याये फइ मखुत समेत धायेगु सुरु याना हःगु खः। तर पार्टी नेतृत्वं आः निगुलिं बिचाःयात थाय् बिसें बिचाःया आधारय् मखुसें कार्यक्रमया पार्टीयात छधी याना तयेगु निर्णय याःगु दु। थुकिं पार्टीयात छुं ई तक जूसां नापं यंकीगु व वयां लिपा हानं मेगु एकताया सूत्र लुइगु आशा यायेफु ।

खतुं राजनीतिइ छुं नं राजनीतिक पार्टी विभाजन जुइगु व हानं छप्पँ जुइगु छगू कथंया नियमित प्रक्रिया खः। देशय् आः दुगु तःधंगु धाःगु मेमेगु पार्टीत नं थज्याःगु विभाजन-एकताया प्रक्रियां न्ह्यायेधुंकूगु दु। तर थौं देश गुगु अवस्थां न्ह्याः वनाच्वंगु खः, थ्व इलय् शान्ति प्रक्रियाया छगू प्रमुख पक्ष जुयाच्वंगु माओवादी विभाजन जुल धाःसा उकिया लिच्वः मुक्कं शान्ति प्रक्रियाय् हे लाः वनीगु खतरा दु। उकिं नं थ्व इलय् माओवादीयात विभाजनपाखें पनेमाःगु अतिकं आवश्यक जुयाच्वंगु खः। माओवादीया ग्वाहालि बिना न शान्ति प्रक्रिया पूवनी, न न्हूगु संविधान दयेके फइ। थ्व खँयात वाःचायेकाः नेतातय्सं पार्टीयात छधी यायेगु सूत्र लुइकूगु निश्चय नं लसकुस यायेबहः जू ।

More Stories Like this