ई दत्तले न्ह्यलं ब्वाइपिं न्ह्यलुवात !

सुरेश शाक्य 'लप्ते'

वंगु ने.सं. ११३२ न्हूदँ कुन्हु भिंतुना ज्याझ्वलय् वर्तमान प्रधानमन्त्री डा. बाबुराम भट्टराईं नेवाः भासं सम्बोधन यानाः सकल नेवाःतय्गु ध्यान सालेत ताःलात। थुगु संबोधन यानाः लांलां तक नेवाः पत्रपत्रिकाय् न्हाय् तपुकाः अनेक प्रशंसा व बुखँ नं पिदन। थ्व तसकं बांलाःगु ज्या यानादिल वा वय्कः प्रमजुं नेवाःतय्गु निंतिं भिंगु हे ज्या यानादी इत्यादि आशा नं जूगु खः। प्रमजुं नेवाः भासं संबोधन यानादीगु लसतां नेवाः न्ह्यलुवाः भाजु मय्जुपिंसं लसताया ख्वति तकं हायेकादिल तर व ख्वबि गोहीया ख्वबि थें जक जुयाच्वंगु दु थौं वयाः ।

नेपाल संवत्यात राष्ट्रिय मान्यता बिउगु नं तःदँ दयेधुंकल। अथे खःसां नं थौंतक राष्ट्रिय स्तरं पात्रो, भित्ते पात्रो पिथनेगु ज्या जूगु मदु। थ्व पात्रो पिथनेत थीथी न्ह्यलुवातय्गु हे संयोजकत्वय् छगू उच्च स्तरीय कार्यदल नं गठन यात। उगु समितिं लछिया दुने व्यवस्थित कथं तिथिमितिया कार्ययोजना तयार यानाः पात्रो पिथनेत ग्वाहालि याःगु खः। थ्व ई फुनाः नं स्वला फुइन तर नं थुगु समितिं छु गुकथं ज्या यानाच्वंगु दु धइगु बारे धाःसा छुं हे बुखँ पिहां मवः, छाय् थें?

लिसें ने.सं. ११३२ पोहेलाथ्व एकादशी कुन्हु 'देशय्मरु झ्या:' वाःपति 'बालं च्वंपिंत राहत बीगु, बाः पुलाः च्वंतले थने मदइगु' धइगु बुखँ पिदंगु नं ब्वने मालाः तसकं दुःख ताल। नेवाः स्वायत्त राज्य घोषणा याःगु नं निदँ पुलेधुंकल। तर नं नेवाः न्ह्यलुवात नेवाः एकता दिवस, ज्यापु दिवस, नायः दिवस आदि धकाः दिवस न्यायेकाः भिंतुना व तुच्चा ज्याझ्वलय् जक सीमित जुयाच्वन तिनि। थन नेवाःतय्त द्यःलाः थःपिंत माःगु फुक्क पलाः ल्ह्वनेधुंकलं नं नेवाःत सुम्क छाय्?

नेवाः स्वायत्त राज्य घोषणा यानाः थःथः जक भिंतुना ज्याझ्वः यानाः झीसं राज्य काये फइ ला? स्वनिगःया थाय् थासय् च्वंपिं फुक्क गैर नेवाःतय्त बालं थने मदइगु कानून लागू याःसां थ्व नेवाः स्वायत्त राज्य धकाः गुगु कथं कायम याये फइ? जःलाखःला देय् भारतय् थ्वहे बालं च्वंपिंत थने मदुगु कानूनं यानाः कयौं जनधनया क्षति जुइक ल्वापु जुयाच्वंगु बुखँ स्वया हे च्वंगु दु जुइ। थथे हे नेवाः स्वायत्त राज्यया माग यानाच्वंगु इलय् माग पूरा जुइ न्ह्यः हे कानून लागू यात धाःसा गुकथं नेवाः राज्यया व्यवस्था याये फइ? थुखेपाखे बिचाः यायेगु गबले?

नेवाःतय् जिचाभाजु जुयाः प्रम जुं नेवाः भासं संवोधन यात धकाः खसब्रम्हूतय्सं धायेवं झीगु आज्जु पूवंगु तायेकेगु बांलाःगु खँ खः ला? दुनें दुनें नेवाःतय्त गःपतय् स्वतिपाँय् तयाहःगुया विरोध यायेगु गबले? नेवाःतय्गु राज्य कायम यायेत धकाः नेपाःया नगुमाय् भुजिं छ्यं पाय्कूगु थाय्या व्यवस्था याना बिउसां सुंक च्वनेगु? नेवाःतय्गु जनसंख्या ति हे जक जनसंख्या दुपिं तामाङ्गतय्सं स्वनिगः भुनाच्वंसां सुंक च्वनेगु?

इमेज न्यूज एफ.एम. या छगू ज्याझ्वलय् मन्त्री राजेन्द्र महतों तराईपाखें चाहे जूसां स्वनिगःयात नाकाबन्दी यायेगु तकं अभिव्यक्ति बिउगु दु। उकीयात नं झी नेवाः न्ह्यलुवातय्सं छुं हे विरोध तकं यायेगु पलाः न्ह्याकूगु मदु, छाय्?

अथे हे थौंकन्हय् स्वनिगलय् लँ तबाला यायेगु नामय् थाय्थासय् छेँ थुनेगु ज्या न्ह्यानाच्वंगु दु। उकियात नं खास हे विरेध व प्रतिकार यायेगु आँट तकं याःगु मदु। द्वलंद्वःदँ न्ह्यवंनिसें नेवाः वस्तीयात तहसनहस यायेगु ताः तयाः थाय् थासय् च्वंगु छेँ थुं वये माःगु छाय्? अले गाडीया चाप अप्वः जूसा गाडी हे दुमकायेगु बांलाःगु खँ खः। हाकनं नेवाः लागाय् नेवाःतय्गु गाडी गुलि हे दु धकाः? पूर्व मेचीनिसें पश्चिम महाकालीया फुक्क जनतायात थ्वहे स्वनिगलय् दुत कयाः स्वनिगःयात कुरुप यायेगु कुतःयात छाय् झीसं विरोध मयायेगु?

झी नेवाः न्ह्यलुवात ई दत्तले न्ह्यलं ब्वानाः मर्काय् लाःपिंसं छुं धाः मवः धकाः च्वनाः गुबले नेवाः एकता, नेवाः स्वशासन, नेवाः स्वायत्त राज्य सार्थक याये फइ?

More Stories Like this