न्हिं छगू जातीय प्रदेश बन्द

थौं देय्न्यंकंया सीडीओ ज्याकुथी धर्ना

येँ / (सन्ध्या टाइम्स) प्रधानसेनापति प्रकरणय् राष्ट्रपति डा. रामवरण यादवं ल्ह्वंगु पलाः भिंकेमाःगु माग यासें एकीकृत नेकपा माओवादीं देशव्यापी आन्दोलन यायेगु झ्वलय् थौं देय्न्यंकंया सीडीयो ज्याकुथी धर्ना बिउगु दु । थौं सुथय् १० निसें १२ बजे तक देय्या ७५ गुलिं जिल्लाया सीडीओ ज्याकुथी धर्ना बीगु ज्या जूगु खः । उकिं यानाः देय्या फुक्क हे सीडीओ ज्याकुथी निघौ तक कर्मचारीत तकं दुने दुहां वने मखनाः ज्या ठप्प जूगु खः ।

संघर्षया झ्वलय् माओवादीं फुक्कं जातीय प्रदेशत छन्हु छन्हु बन्द यायेगु ज्याझ्वः नं पित हःगु दु । थ्व झ्वलय् जेठ २२ गते थारुवान प्रदेश बन्द यायेत्यंगु दुसा वयां लिपा छसीकथं २३ गते कोचिला प्रदेश, २४ गते ताम्सालिङ प्रदेश, २५ गते तमुवान प्रदेश, २६ गते किराँत प्रदेश, २७ गते लिम्बुवान प्रदेश, २८ गते मिथिला-भोजपुरा-अवध प्रदेश, २९ गते मगरात प्रदेश, ३१ गते भेरी-कर्णाली प्रदेश व असार १ गते सेती महाकाली प्रदेश बन्द यायेत्यंगु दु । नेवाः प्रदेशया हकय् वंगु १८ गते जूगु नेपालमण्डल बन्दयात हे समर्थन यानागु खँ धाःगु दु ।

उकथं हे थ्वया दथुइ थीथी इलय् चक्का जाम व थीथी कथंया जुलुस, र्‍यालीया ज्याझ्वः नं तयातःगु दु । २२ गते देय्न्यंकंया मू मू शहरय् सुथय् १० निसें १२ बजे तक चक्का जाम यायेगु ज्याझ्वः तयातःगु दु । अथे हे २४ गते पुतला दयेकाः शव जुलुस पिकाइगु ज्याझ्वः दुसा २५ गते सांस्कृतिक रुपं गं न्यायेकाः जुलुस पिकायेगु ज्याझ्वः दु ।

देय्या फुक्क हे संवैधानिक ज्यायात निष्काशन याःगुया प्रतिक कथं २९ गते देय्न्यंकंया हे मू मू शहरय् डाक्टरतय्सं लँ जाम यानाः सतकय् वयाः विरामी जाँचे यायेगु ज्याझ्वः यायेत्यंगु दु ।

उकथं हे ३१ गते सतक बन्द यानाः देय्न्यंकंया शिक्षकतय्सं सतकय् वयाः विद्यार्थीतय्त आखः ब्वंकाः विरोध प्रदर्शन यायेत्यंगु दु ।

थ्व बाहेक देय्या फुक्क हे गाविस व जिविस घेराउ यायेगु मू मू शहरय् सभा यायेगु ज्याझ्वः नं माओवादीं निर्धारण यानातःगु दु ।

सरकारं राजीनामा बिया वयेधुंकाः माओवादीं देय्न्यंकं थीथी जातीय प्रदेशय् थःपिनिगु हे जन सरकार गठन यायेगु तयारी नं यानाच्वंगु खँ सीदुगु दु । माओवादीं न्हापा जिल्लाया आधारय् जनसरकार गठन याःगु खःसा आः जातीय नामं तयातःगु प्रदेशया लिधंसाय् जन सरकार गठन यायेत्यंगु खः । माओवादीं गठन याइगु अज्याःगु जनसरकारं थःगु लागा दुने च्वनाः सुनां नं राष्ट्रपति व राष्ट्रपतिया पलाःयात समर्थन यात धाःसा वयात प्रदेशं पितिना हयेगु तकया ज्या यायेफु धकाः नं धाःगु दु । थुकिया निंतिं माओवादीं आन्तरिक तयारी यायेधुंकूगु दु ।