थौं गुप्ताया मुद्दा सर्वोच्चं फैसला याइगु

येँ (सन्ध्या टाइम्स)/सूचना तथा सञ्चारमन्त्री नापं मधेसी जनअधिकार फोरम गणतान्त्रिकया अध्यक्ष जय प्रकाशप्रसाद गुप्ताया भ्रष्टाचारसम्बन्धी मुद्दाय् सर्वोच्च अदालतं थौं अन्तिम फैसला याइगु जूगु दु। न्यायाधीश सुशील कार्की व तर्कराज भट्टया मंकाः इजलासय् गुप्ता मुद्दाया फैसला जुइ। लाभया मदय् दुगु इलय् २ करोड ८ लाख तका भ्रष्टाचार याःगु द्वपनय् विशेष अदालतं २०५९ चैत्र ६ गते वय्कः विरुद्ध मुद्दा तःगु खः। तर न्यायाधीश भूपराज अधिकारीनापंया इजलासं गुप्ताया सम्पत्ति स्रोत खुले जूगु धकाः २०६४ जेठ २४ गते सफाई बिउगु खः। विशेषया फैसला विरुद्ध सरकारं २०६४ कार्तिक २२ गते हाकनं सर्वोच्चय् पुनरावलोकन निवेदन दर्ता याःगु खः। गिरिजाप्रसाद कोइराला प्रधानमन्त्री जुयाच्वंगु इलय् गुप्ता प्रेस सल्लाहकार व तःक्वःमछि मन्त्री जुइधुंकूम्ह खः।
थ्वहे दथुइ कुटनीतिक राहदानी मिउगु द्वपं दुम्ह सभासद् नारदमुनी रानायात अख्तियारं थौं म्याद थपया नितिं विशेष अदालतय् पेस याइगु जूगु दु। रानायात थप अनुसन्धानया नितिं म्याद थप यायेत्यंगु खः। कैलालीया सभासद् राना एमालेपाखें समानुपाति कोटां वःम्ह खः। फरार जुयाच्वंम्ह रानां म्हिगः अख्तियारय् वनाः थः हे हाजिर जूवंगु खः ।