छेँ थुंगु विरोधय् महाराजगंजय् सभा

येँ (सन्ध्या टाइम्स)/लँ तब्याकेगु नामं येँया थीथी थासय् छेँ थुनेगु ज्याया विरोधय् महाराजगञ्जय् सार्वजनिक सुनुवाई ज्याझ्वः जुल। लाजिम्पाटया नारायणगोपाल चोकंनिसें जुइजःसि तकया सतक विस्तारं पीडित जनसंघर्ष समितिया ग्वसालय् जूगु उगु सभाय् येँया वडा नं १, २, ३, १६ व २९ वडाया पीडित छेँजःपिंसं ब्वति काःगु खः।
ज्याझ्वलय् प्रधानमन्त्री डा. बाबुराम भट्टराई नापं नगर विकास परियोजना प्रमुख भाइकाजी तिवारीपिनि कडा विरोध जूगु खः ।

ज्याझ्वलय् न्ववाःपिं वक्तातय्सं द्वलंद्वः दँ न्हापांनिसेंया रैथानी वस्ती थने मजिउगु, विकासया नामय् विनास याये मजिउगु, चिं तया थकूगु दक्व छेँया लालपुर्जा दुगु, लँ तब्या यायेगु खःसा विकल्पया रुपय् मेथासं लँ दयेकेमाःगु वा ओभर पुल दयेकेमाःगु, नेतातय्सं न्हापां थः त्याकावःगु गां निं विकास यायेमाःगु, दयेकातःगु दक्वं छेँत नगरपालिकाया मापदण्ड कथं दयेकातःगु, नियमकथं ४ मिटर, ७ मिटर त्वःताः हे दयेकातःगु, मनपाय् कर पुलातःगु जुयाः कानुनी रुपं थुने मजिउगु व वि.सं. २०३३ सालया मापदण्ड खारेज यायेमाःगु खँ न्ह्यथंगु खः। थःपिंत मिडियां साथ मबिउसां सरकारं २४ घौया दुने हे छेँ थुनेगु अभियान दिकेमाःगु व मखुसा जनता विरोधय् कुहां वयेगु नापं डोजरया क्वय् द्यनाः बलिदान बीगु खँ नं उमिसं धाःगु दु ।

मानव अधिकारवादी नेता कपिल श्रेष्ठं आः नं जनताया छेँ थुनेगु अभियान मदिकल धाःसा सरकारनापं सरकारी निकायय् च्वंपिनिगु नां तकं अन्तर्राष्ट्रिय आतंकवादीतय् हाकुगु धलखय् लाइगु ख्याच्वः बियादिल ।

पीडित संघर्ष समितिया संयोजक दिपक के.सीं. सकसितं ढुक्क जुयाः मच्वँसे सतर्क जुयाच्वनेत इनाप नं यानादिल। वय्कलं थौं थुनाच्वंगु छेँय् जूगु खर्च जक विद्युत प्राधिकरणय् छ्यःगु जूसा देशय् छगू मिनेट नं मत सिकाच्वने म्वाःलीगु खँ नं कनादिल। ज्याझ्वलय् सभासद् नवीन्द्रराज जोशी, पुलांम्ह मेयर राजाराम श्रेष्ठ, गायक प्रेमध्वज प्रधान, २९ वडाया पुलांम्ह वडाध्यक्ष वर्षाराम भण्डारी, बालाजु संघर्ष समितिया नायः लक्ष्मीदास मानन्धर, होटल व्यवसायी श्यामबहादुर पाण्डे, बैंक व्यवसायी रंजन श्रेष्ठ आदिपिंसं नं न्ववानादीगु खः ।