सेना समायोजनयात पूर्णता बीमाल

शान्ति प्रक्रियाय् सुचारु रुपं न्ह्यानाच्वंगु ज्याय् अवरोध सिर्जना जुइवं थ्वनाप सम्बन्धित थीथी ज्याखँत नं दिउगु दु। खास यानाः लडाकु वर्गीकरण यायेगु ज्याय् स्वेच्छिक अवकास कायेगु धकाः निर्णय यायेधुंकूपिं लडाकुतय्त विदाई बिया छ्वयेगु ज्या धुंकेमाःगु खःसां सेना समायोजनय् वनेगु धकाः क्वःछिउपिं लडाकुतय् ल्याः अप्वःगु कारणं यानाः थ्व ज्या नं अवरुद्ध जूवंगु दु। सेना समायोजनाय् वनेगु धकाः ल्यःपिं लडाकुतय् ल्याः क्वःछिनातःगु ल्याः स्वयां अप्वःगु कारणं समस्या पिहां वःगु खः। अप्वःपिं लडाकुतय्त आः छु यायेगु धकाः छुं निर्णय मजूनि। माओवादीं मुक्कं ६५०० म्ह जक लडाकुयात समायोजनाय् यंकेगु धकाः बियातःगु ल्याःयात आः छुं भचा अप्वयेके माली धकाः प्रस्ताव तःगु दुसा उकियात एमाले व कांग्रेसं अस्वीकार याःगु कारणं थ्व विषय हे विवादय् लाःवंगु दु। उखे स्वेच्छिक अवकास काःपिं लडाकुतय्त शिविरं अलग्ग तयाः उमित राज्यं बीमाःगु दां नं फुक्कं बियाः विदा बिया छ्वयेमाःगु खः। ल्याःया विवादं यानाः विदाईया ज्या नं थाति लाः वंगु दु। थ्वहे झ्वलय् आः विदा काइपिं लडाकुतय्त लःल्हाइगु सम्मानपत्र गज्याःगु जुइमाः धइगु मेगु विवाद नं पिहां वःगु दु। माओवादीं सकलें लडाकुतय् वीरताया व्याख्या यानाः दसिपौ बीमाःगु माग यानाच्वंगु दुसा कांग्रेसं उकिया विरोध यासें 'सामान्य पौ' जक बीत नं बिचाः यायेमानि धया हःगु दु। थ्व विवादं हानं मेगु मोड काइगु खतरा पिहां वयेफु। उकिं क्वचायेधुंकूगु ज्यायात पूर्णता बिया छ्वःसा याउँसे च्वनीगु खः। थाका तल धाःसा न्हून्हूगु विवाद सिर्जना जुयाः झन जटिलता ब्वलना बीफु ।

More Stories Like this